Вяртанне тэатра

Источник материала:

Палескi дзяржаўны драмтэатр быў створаны ў Пiнску адразу пасля вызвалення Заходняй Беларусi ў 1939 годзе. Пасля вайны ён меў статус абласнога. А пасля скасавання Пiнскай вобласцi як адмiнiстрацыйнай адзiнкi тэатр перастаў iснаваць. Большая частка трупы перабралася ў Магiлёў, некаторых артыстаў запрасiлi ў Гомель. Але гiсторыя тэатральнага жыцця ў горадзе над Пiнай на гэтым не скончылася. Улюбёныя ў Мельпамену пiнчукi стварылi самадзейную трупу пры гарадскiм Доме культуры. Больш за дваццаць гадоў калектывам кiруе Iван Базан. Тэатр пад назвай «Дыяген» паставiў сотнi спектакляў. У год ён прадстаўляў на суд гледачоў да сямi новых дарослых i дзiцячых пастановак. Iгралi ў школах, дзiцячых садах, сельскiх Дамах культуры. «Дыяген» не меў сваёй сцэны i сам iшоў да гледача. Бывала, давалi да трох спектакляў у дзень.

На момант пераўтварэння тэатра-студыi ГДК у Палескi драматычны тэатр трупа была ўжо сталым калектывам з высокiм званнем «народны», дзе працавалi як прафесiйныя артысты, так i таленавiтыя самародкi. А ўчора тэатр атрымаў свой дом. Гэта гiстарычны будынак па вулiцы Веры Харужай, дзе раней размяшчаўся кiнатэатр «Радзiма», а яшчэ раней, за польскiм часам, было казiно. Тут праведзена рэканструкцыя. Закончаны мантаж сцэнiчнага абсталявання, аснашчана ўсiм неабходным глядзельная зала на 120 месцаў. У дзень адкрыцця гледачам паказалi кавалачкi розных спектакляў з п’ес Чэхава, Дунiна-Марцiнкевiча, Андрэя Курэйчыка, Юлiя Кiма.

Павiншаваць артыстаў i гледачоў з навасельнай прэм’ерай прыехаў старшыня аблвыканкама Канстанцiн Сумар.