Дарагая мая гранiца

Источник материала:

Пакаранне рублём

Агульнавядома, што за ўсё на гэтым свеце трэба плацiць. За парушэнне Дзяржаўнай гранiцы Беларусi таксама.

Як паведамiлi карэспандэнту газеты «Звязда» ў прэс-цэнтры Дзяржкамiтэта пагранiчных войскаў, летась парушальнiкам мяжы было прад’яўлена 70 iскаў на агульную суму больш за 2,2 мiльёна рублёў. Сума гэтая ўзята не з галавы. Менавiта столькi сродкаў было затрачана на затрыманне i ўтрыманне парушальнiкаў мяжы. Як правiла, грошы хоць i са спазненнем, але ўдаецца спагнаць. Летась судамi, з улiкам заяўленых у папярэднiя гады, было задаволена 98 iскаў да парушальнiкаў мяжы на суму каля 4 мiльёнаў рублёў.

Даводзiцца адказваць рублём таксама i нядобрасумленным мытнiкам i пагранiчнiкам.

Напрыклад, у мiнулым годзе да кожнага з 21 мытнiка, асуджанага за службовыя злачынствы, былi прыменены i штрафныя санкцыi на сумы ад 120 да 200 мiльёнаў рублёў.

Апроч таго, у 2005 годзе з шэрагу асуджаных мытнiкаў былi спагнаны ў даход дзяржавы i хабарныя грошы — больш за 4,3 мiльёна рублёў, а таксама — пошлiны i судовыя выдаткi на суму каля 2,5 мiльёна рублёў. У даход дзяржавы таксама былi канфiскаваны грашовыя i матэрыяльныя сродкi, атрыманыя злачынным шляхам, на агульную суму больш за 100 мiльёнаў рублёў.

Беларускай ваеннай пракуратурай таксама прыцягваюцца да фiнансавай адказнасцi афiцэры i курсанты, якiя не выканалi ўмоў кантракта па службе ў пагранiчных войсках. Паводле заяўленых iскаў такiм нядобрасумленным асобам неабходна выплацiць у якасцi кампенсацыi затрат на навучанне 800 мiльёнаў рублёў. Летась, дарэчы, такiя парушальнiкi кантрактаў кампенсавалi дзяржаве ўрон амаль на 14 мiльёнаў рублёў.