Ваўкi загналi чалавека на дрэва

Источник материала:

I так бывае

Выратавальнiкi мясцовага аддзела па надзвычайных сiтуацыях ахвотна дзеляцца падрабязнасцямi аб гэтым здарэннi, якое адбылося ў iх раёне. Як адзначыў у гутарцы з нашым карэспандэнтам намеснiк начальнiка па дзяржаўнай сiстэме папярэджання надзвычайных сiтуацый Зэльвенскага РАНС Сяргей АНТАНОВIЧ, толькi дзякуючы дапамозе людзей жыхар Гродна ўратаваўся ад драпежнiкаў...

Ад аўтобуснага прыпынку да бацькоўскай хаты ў вёсцы Яруцiчы гродзенец дабiраўся пешшу, прычым выбраў найбольш кароткi шлях: прыехаў ён позна, а таму кругi наразаць не хацелася. Па сцяжынцы, што пратаптаў ў полi мясцовы люд, мужчына i накiраваўся ў вёску. Раптоўны шорах ззаду прымусiў яго азiрнуцца: нечаканым спадарожнiкам чалавека быў воўк. Што было сiлы мужчына гаркнуў на драпежнiка, аднак той нават вухам не павёў i пачаў наблiжацца. Адчуўшы, што голымi рукамi з нахабнай жывёлiнай не ўправiцца, мужчына пабег... На шчасце, непадалёк ад месца здарэння раслi дрэвы — на адно з iх i забраўся перапуджаны ўцякач. А воўк прыладзiўся побач, цярплiва чакаючы, калi ахвяра акажацца ўнiзе. Да яго далучылiся яшчэ два галодныя драпежнiкi.

Да вёскi — рукой падаць, аднак нiхто не чуў крыку няшчаснага, якi спрабаваў паклiкаць людзей на дапамогу. На ўсякi выпадак мужчына вырашыў праверыць, цi можна адсюль дазванiцца па мабiльным тэлефоне ў раённы цэнтр. Яму пашанцавала: на вышынi апарат злавiў сiгнал, i мужчына паведамiў аб сваiх няшчасцях у мiлiцыю. Супрацоўнiкi апошняй звязалiся з выратавальнiкамi, i да воўчай «засады» выехалi байцы пажарнага атрада з вёскi Чыглевiчы, што знаходзiцца ў васьмi кiламетрах ад Яруцiчаў, паклiкаўшы з сабой некалькi паляўнiчых. Калi машына выратавальнiкаў наблiзiлася да месца здарэння, ваўкi спешна збеглi ў лес. А супрацоўнiкi МНС дапамаглi прамёрзламу пацярпеўшаму злезцi з дрэва.

Як паведамiлi ў раённым аддзеле МНC, ваўкi ў гэтым месцы з’явiлiся невыпадкова: побач знаходзяцца сельскагаспадарчыя магiльнiкi, куды драпежнiкi наведваюцца, каб падсiлкавацца. Праўда, пасля здарэння паляўнiчыя, якiя прачэсвалi лес у пошуках нахабных шэрых разбойнiкаў, што напалi на чалавека, больш ваўкоў не бачылi. Вiдаць, драпежнiкi адчулi нежартоўную пагрозу i рэцiравалiся ў iншае месца.