Першы камень SOS-дзiцячай вёскi ў Магiлёве

Источник материала:

Дзiцячая вёска будзе пабудавана паблiзу Пячэрскага лесапарку. Плануецца, што яна пачне працаваць праз два гады, вясной 2008 года: гэта будзе 12—14 домiкаў, разлiчаных на сотню дзяцей-сiрот.

Цяпер у Магiлёўскай вобласцi налiчваецца каля 5 тысяч дзяцей-сiрот, i каля 2 тысяч з iх жывуць у дамах-iнтэрнатах. Мяркуецца, што ў SOS-дзiцячай вёсцы, якая больш падобная на дзiцячыя дамы сямейнага тыпу, сiротам будзе больш утульна жыць.

— Мы сёння заклалi камень у будаўнiцтва нашай будучынi, — выказаў сваё меркаванне старшыня Магiлёўскага аблвыканкама Барыс Батура. — Праблема сiроцтва застаецца вельмi вострай, i ад таго, як будуць выхоўвацца дзецi, што засталiся без бацькоўскай апекi, залежыць, наколькi здаровым i жыццядзейным будзе наша грамадства ўвогуле.

У Беларусi ўжо ёсць дзве SOS-вёскi для дзяцей — у Бараўлянах i Мар’iнай Горцы. А ўсяго ў свеце iх больш за 450. Дабрачынная арганiзацыя «SOS-Кiндэрдорф Iнтэрнацыяналь», якая была заснавана ў Аўстрыi, дзейнiчае з 1949 года i ажыццявiла свой праект у 132 краiнах свету.

На Магiлёўскi праект дабрачыннiкi маюць намер выдаткаваць каля 2 мiльёнаў еўра, гэта будуць спонсарскiя грошы з краiн Заходняй Еўропы. З гэтай жа крынiцы будуць фiнансавацца ўтрыманне вёскi i навучанне кадраў. У кожным доме будзе працаваць SOS-мацi, якая стане даглядаць дзяцей.

Прэзiдэнт мiжнароднай дабрачыннай арганiзацыi «SOS-Кiндэрдорф Iнтэрнацыяналь» Хельмут Куцiн сказаў на закладцы каменя, што ён чакае жанчын, якiя будуць працаваць SOS-мацi для дзiцячай вёскi i выказаў iмкненне пабудаваць у Магiлёве «нешта дасканалае» пры ўдзеле ўладаў.

— Давайма пойдзем разам, поплеч — у разуменнi i сяброўстве, — сказаў на ўрачыстай цырымонii Хельмут Куцiн.

Дэпутат Палаты прадстаўнiкоў Нацыянальнага сходу Наталля Аўдзеева выказала шчырую ўдзячнасць усiм, хто дапамагае нашай краiне i дзецям.