Аплата працы механiзатараў у выхадныя днi — у двайным памеры

Источник материала:

«Гарачы» тэлефон «Звязды» 287-17-41

У самой гаспадарцы, паводле слоў заяўнiцы, iм патлумачылi наступнае. Умоўна кажучы, работнiк павiнен адпрацаваць месяц. Потым яго зарплата за азначаны тэрмiн падсумоўваецца i дзелiцца на колькасць адпрацаваных дзён. Атрымлiваецца нейкi каэфiцыент, якi i ўплывае на суму заробку. Але, скардзiлася далей Святлана Казiмiраўна, у гаспадарцы дадавалi: калi, маўляў, адпрацаваў у нядзелю, а ў панядзелак узяў адгул, дык працу ў выхадны дзень не аплацяць. Як так? Яшчэ жанчына прасiла ўдакладнiць наступнае. «Працоўны дзень механiзатараў нармiраваны, доўжыцца 8 гадзiн. Аднак падчас сяўбы iм даводзiцца працаваць звыш нормы. Цi павiнны за гэта даплачваць?» Зварот Святланы Дубовiк адносна аплаты працы мужа быў разгледжаны з выездам на месца начальнiкам аддзела эканомiкi ўпраўлення сельскай гаспадаркi i харчавання Капыльскага райвыканкама Аляксандрай Мiхайлаўнай Тарасевiч. Вось што ёй, у прыватнасцi, было высветлена.

«Аплата працы ў выхадныя днi рабочым адбываецца ў двайным памеры згодна з зацверджаным калектыўным дагаворам прадпрыемства. Так, напрыклад, за працу 16 красавiка налiчана асноўнай заработнай платы 51 502 рублi, i за работу ў выхадны даналiчана за гэты дзень 51 502 рублi. Па пытанню аплаты за перапрацоўку працоўнага часу ўстаноўлена наступнае. Згодна з Палажэннем па аплаце працы, у дадзенай гаспадарцы павiнен весцiся гадавы сумiраваны ўлiк рабочага часу i перапрацоўку рабочага часу трэба кампенсаваць шляхам прадастаўлення дзён адпачынку цi даплат. За студзень—сакавiк 2006 года адпрацаваны працоўны час М.А. Дубовiка не перавышае дзяржаўнай нормы працоўнага часу за дадзены перыяд працы. Усяго за 8 працоўных дзён веснавых палявых работ красавiка 2006 года М.А. Дубовiку налiчана заработнай платы 566 тысяч рублёў.» Далей Аляксандра Мiхайлаўна паведамляе рэдакцыi, што на ўсе пастаўленыя пытаннi С.К. Дубовiк дадзены вусныя адказы, якiмi апошняя задаволена.

Сяргей РАСОЛЬКА.