Колькi грошай трэба для лячэння?

Источник материала:

ВАША ПIСЬМО

— Парадак шпiталiзацыi наступны. Хвораму трэба звярнуцца да ўрача-афтальмолага раённай палiклiнiкi, дзе будзе пастаўлены дыягназ. Калi паталогiя можа назiрацца i лячыцца ва ўмовах ТМА (тэрыятарыяльнага медыцынскага аб’яднання), то яна там i лечыцца. Аднак калi ёсць нейкiя праблемы (урач можа не справiцца або патрабуецца канкрэтнае хiрургiчнае ўмяшанне), чалавек накiроўваецца ў наша аддзяленне. Папярэдне хворы, згодна са спецыяльнымi стандартамi, праходзiць у сваiм ТМА абследаванне, пасля чаго накiроўваецца да нас. Калi гэта не экстранная, а планавая аперацыя, то iснуе папярэднi запiс. Чалавек прыязджае, ужо ведаючы, што назаўтра цi нават ў той жа дзень ён будзе прааперыраваны. Пры гэтым калi ў заходнiх краiнах хiрургiчнага лячэння па афтальмалагiчнай паталогii чакаюць да паўгода, то ў нас, як правiла, з моманту ўстаноўкi дыягназу да аказання хiрургiчнай дапамогi праходзiць не больш тыдня-двух.

Хiрургiчнае лячэнне вочнай паталогii бясплатнае, нават правядзенне аперацый, якiя патрабуюць расходных матэрыялаў (пры той жа катаракце — спецыяльны шыўны матэрыял, штучны хрусталiк), забяспечваецца бальнiцай. Адзiнае пытанне — калi праводзiцца iмплантацыя iмпартнага хрусталiка, якi трэба набываць за наяўныя грошы. Праўда, на сёння мы яшчэ не закупiлi iмпартных хрусталiкаў, яны вельмi дарагiя. Але i тыя штучныя хрусталiкi, якiмi мы карыстаемся, добрай якасцi i даюць высокую вастрыню зроку.

Дарэчы, да нас часта прыязджаюць i без накiравання з раёна. Бывае, чалавека не задавальняюць рэкамендацыi раённага спецыялiста, узнiкае нейкая псiхалагiчная насцярожанасць. Мы такiх хворых абследуем, ставiм дыягназ, даём парады, аказваем медыцынскую дапамогу. Па серадах з 13 гадзiн я як галоўны афтальмолаг вобласцi праводжу прыём на базе абласной кансультацыйнай палiклiнiкi, а па чацвяргах з 12 гадзiн прымае загадчыца кафедры вочных хвароб Гродзенскага медунiверсiтэта Святлана Мiкалаеўна Iльiна. Кансультацыi, як i лячэнне, бясплатныя.

— Цi ёсць у вобласцi праблемы з кадрамi афтальмолагаў i абсталяваннем?

— Забяспечанасць афтальмолагамi ў Гродзенскай вобласцi практычна стопрацэнтная. На належным узроўнi аснашчаны апаратурай раёны. Гэта датычыцца i нашага аддзялення, якое фактычна з’яўляецца абласным цэнтрам мiкрахiрургii вока. Адзiнае пытанне на сёння — неабходнасць у набыццi аперацыйнага мiкраскопа, каб перайсцi на бясшоўную хiрургiю катаракты.

— Наколькi наблiжана афтальмалагiчная дапамога да вяскоўцаў з улiкам таго, што iм бывае даволi праблематычна дабрацца ў раённую палiклiнiку?

— Афтальмолагi ў раёнах удзельнiчаюць у прафаглядах, выязджаюць на прадпрыемствы, у вёскi. Канешне, у такiх выпадках урач не можа быць аснашчаны апаратурай для пастаноўкi складаных дыягназаў. Аднак калi ён бачыць, што ў чалавека паталогiя, якая патрабуе дадатковага абследавання, то запрашае хворага да сябе. Плюс да гэтага i мы, спецыялiсты аддзялення мiкрахiрургii вока, таксама выязджаем у раёны — аказваем кансультацыйную дапамогу, праводзiм адбор пацыентаў на лячэнне ў абласной бальнiцы.

— А цi маглi б кiраўнiкi сельвыканкамаў, папярэдне вывучыўшы сярод жыхароў сiтуацыю са скаргамi на праблемы са зрокам, запрасiць афтальмолагаў у свой рэгiён?

— Канешне, гэта цалкам рэальна. Трэба скласцi спiс маючых скаргi i ўзгаднiць з кiраўнiцтвам ТМА запрашэнне раённых спецыялiстаў.

Увогуле, калi з’явiлiся нейкiя праблемы з органам зроку, трэба абавязкова звярнуцца да ўрача-афтальмолага. Бо шэраг хвароб — такiх, як глаўкома — павiнен быць дыягнаставаны на пачатковых стадыях, калi лягчэй спынiць падзенне зрокавых функцый. Трэба памятаць, што пры шэрагу захворванняў органа зроку процiпаказаны цяжкая фiзiчная праца, ужыванне спiрных напояў, курэнне.

Барыс ПРАКОПЧЫК.