Акцябрск чакае «Берагiню»

Источник материала:

Але за днямi заключнай дзеi ёсць яшчэ iншыя днi, калi ў гарадскi пасёлак з’язджаюцца госцi з усiх абласцей. Такое было тут днямi ў час правядзення трэцяй Рэспублiканскай навукова-практычнай канферэнцыi «Традыцыйная культура i дзецi: праблемы этнавыхавання».

Месца правядзення канферэнцыi не выпадкова супала з месцам канцэртаў i конкурсаў «Берагiнi», бо ў абодвух выпадках усё адбываецца дзеля адраджэння традыцыйнай народнай культуры, аўтэнтычнага фальклору, выхавання ў дзятвы i моладзi патрыятычных пачуццяў да Радзiмы i яе нацыянальнай спадчыны.

Навукова-практычная канферэнцыя была арганiзавана мiнiстэрствамi культуры, адукацыi, Беларускiм дзяржаўным iнстытутам праблем культуры, Грамадскiм аб’яднаннем «Беларускi фонд культуры». Немалаважная роля сярод арганiзатараў адводзiлася Гомельскаму аблвыканкаму i Акцябрскаму райвыканкаму.

На пленарным пасяджэннi прагучалi даклады на тэмы актуальных пытанняў традыцыйнай народнай культуры, карэннага светапогляду этнасу, месца свецкай культуры ў сучаснай фальклорнай прасторы Беларусi.

На пасяджэннях секцый побач з вядомымi навукоўцамi, выкладчыкамi ВНУ, работнiкамi клубных устаноў культуры i бiблiятэк выступалi юныя аматары народнага мастацтва. Як сапраўдныя работы дарослых спецыялiстаў гучалi дзiцячыя доследы, назвы якiх яскрава сведчаць пра неабыякавасць да ўсяго радзiннага. Так, напрыклад, вучнi Мётчанскага адукацыйнага комплексу «Школа-садок» Барысаўскага раёна прыехалi на канферэнцыю з дакладамi «Мастацкiя традыцыi маёй сям’i», «Традыцыйныя святочныя стравы ў бабулiных успамiнах», «Ваенныя падзеi ва ўспамiнах старажылаў Мядоччыны», «Роля мужчыны ў вядзеннi гаспадаркi ў мiнулым i сёння», «Летнiя клопаты жыхароў мядоцкага наваколля».

Вучоныя i даследчыкi зрабiлi агляд, якi закрануў усе вобласцi рэспублiкi, i разам з практыкамi яшчэ раз пацвердзiлi ролю этнавыхавання ў сучасным грамадстве.

Як лагiчны працяг гэтай сумеснай работы напрыканцы гучалi словы: «Да сустрэчы на фестывалi «Берагiня»!» Там на сцэнiчных пляцоўках у чэрвені выступяць калектывы дзiцячых i дарослых фальклорных гуртоў з усiх абласцей Беларусi. А строгае i кампетэнтнае журы назаве лепшых спевакоў, музыкаў, танцораў, майстроў разьбы, вышывання, iнкрустацыi i шмат чаго яшчэ, што дадзена нам у багатую спадчыну.