Беларускiя манеты карыстаюцца попытам...

Источник материала:

Нацыянальным банкам прынята рашэнне аб дадатковым вырабе памятных манет мiнулых гадоў, паведамiлi карэспандэнту «Звязды» ва ўпраўленнi iнфармацыi галоўнага банка краiны.

Сёння беларускiя манеты, паводле слоў начальнiка ўпраўлення iнфармацыi Нацыянальнага банка Анатоля Драздова, асаблiва тыя, што выпушчаны ў рамках мiжнародных манетных праграм, можна набыць больш як у дваццацi краiнах свету. Прычым амаль на ўсе з iх назiраецца проста ажыятажны попыт, як сярод айчынных нумiзматаў, так i iншаземных. Таму, каб задаволiць «апетыты» пакупнiкоў, галоўным банкам i прынята адпаведнае рашэнне па дадатковаму вырабу манет у рамках аб’яўленых тыражоў. У iх лiк трапiлі 20 манет выпуску мiнулых гадоў, сярод якiх «Алiмпiйскiя гульнi 2002 года. Бiятлон», «Штурханне ядра. Алiмпiйскiя гульнi 2004 года», «Буры мядзведзь», «Алiмпiйскiя гульнi 2004 года. Афiны», «Сынкавiцкая царква-крэпасць», «Камянецкая вежа», «Спаса-Праабражэнская царква», «Нацыянальны парк «Белавежская пушча». Зубр», «Бярэзiнскi бiясферны запаведнiк. Бобр», «Нацыянальны парк «Нарачанскi». Лебедзь-шыпун», «Нацыянальны парк «Браслаўскiя азёры». Чайка серабрыстая», «Супольнасць Беларусi i Расii», «г. Вiцебск», «2000-годдзе», «Хрысцiянства (каталiцкая канфесiя)», «2000-годдзе Хрысцiянства (праваслаўная царква)», «Тэнiс», «Вольная барацьба», «Алiмпiйскiя гульнi 2002 года. Фрыстайл» i «Перамога». Як падкрэслiваюць у Нацыянальным банку, цiкавасць, з якой ставяцца да беларускiх манет айчынныя нумiзматы i калекцыянеры за мяжой, сведчыць аб высокай якасцi i добрым дызайне гэтага прадукту.

Сёлета назiраецца таксама i вялiкi попыт беларусаў на залатыя мерныя злiткi, якiх за першыя чатыры месяцы гэтага года было прададзена ў 4,4 раза больш, чым за аналагiчны леташнi перыяд.

Па ўсяму вiдаць, небывалы рост цаны на каштоўны метал, якi працяглы ўжо час назiраецца на сусветных рынках, зрабiў сваю справу — усё большая колькасць грамадзян цiкавiцца золатам у банкаўскiх злiтках, на куплю якога i трацiць свае свабодныя грашовыя сродкi. Так, за студзень—красавiк аб’ём прададзеных насельнiцтву злiткаў з гэтага каштоўнага металу склаў 387,3 кiлаграма — куплена 10 280 штук. За гэты час найбольш заможныя людзi набылi 50 злiткаў па 1 кiлаграму кожны, а таксама 64 злiткi вагой па 0,5 кiлаграма. Як i раней, найбольшай папулярнасцю ў пакупнiкоў карыстаюцца 10-грамовыя залатыя мерныя злiткi: iх за студзень—красавiк набыта 2773 штукi.