Каб вярнулi чэкi, давядзецца зноў рабiць запыт

Источник материала:

Лiлiя Пятроўна Маргелава, п/а Мажа Капыльскага раёна.

На жаль, у лiсце чытачкi няма нiякiх дакладных звестак адносна яе перапiскi з лiквiдацыйнай камiсiяй iнвестфонду. Зрэшты, сваю працу яна скончыла ў канцы мiнулага года, таму ўсё роўна ў нас бы не атрымалася ўдакладнiць выкладзеныя заяўнiцай факты, нават калi б яна не забыла iх адзначыць. Таму, вiдавочна, калi жанчына жадае вярнуць свае чэкi, трэба пачынаць усё спачатку. Для гэтага ёй неабходна звярнуцца ў Мiнскую гарадкую iнспекцыю Камітэта па каштоўных паперах пры Савеце Міністраў РБ (220002 г. Мiнск, вул. Крапоткiна, 44, п. 1203). Паводле слоў яе начальнiка Вiктара Амельяновiча, трэба напiсаць заяву адвольнай формы з просьбай вярнуць чэкi «Маёмасць». Да яе трэба абавязкова прыкласцi ксеракопii (менавiта ксеракопii, а не арыгiналы) трох дакументаў. Па-першае, пасведчання акцыянера фонду, па-другое, дагавора з iм, па-трэцяе, сертыфiката чэкаў «Маёмасць» (апошнi павiнен быць ксеракапiраваны з абодвух бакоў).

— Пасля гэтага мы абавязкова вернем грамадзянiну яго чэкi, няхай нiхто не сумняваецца, — сказаў Вiктар Мiкалаевiч.

А што, калi заяўнiца ўжо выслала арыгiналы дакументаў у мiнулы раз? Атрымаць копii сертыфiката можна ў аддзяленнi банка па месцы жыхарства жанчыны, праўда, гэта паслуга платная. Калi ж арыгiнал захаваўся, ён спатрэбiцца (разам з пашпартам) пры паступленнi ў банк чэкаў «Маёмасць». Нагадаем, што рашэннем урада тэрмiн абарачэння чэкаў «Маёмасць» у чарговы раз падоўжаны — да 30 чэрвеня 2007 года. Паводле слоў Вiктара Амельяновiча, вярнуць грамадзянам належыць 3,5 мiльёна чэкаў «Маёмасць», што i будзе зроблена да вышэйагучанага тэрмiну.