Аляксандр ЛУКАШЭНКА: Беларусь зацiкаўлена ў доўгатэрмiновым узаемавыгадным супрацоўнiцтве з Алтайскi

Источник материала:

Кiраўнiк дзяржавы станоўча ацанiў узровень двухбаковага гандлёва-эканамiчнага супрацоўнiцтва.

Як адзначыў прэзiдэнт, прыезд у Беларусь губернатара Алтайскага края — знак таго, што рэгiён зацiкаўлены ў супрацоўнiцтве з нашай краiнай. Кiраўнiк дзяржавы падкрэслiў, што гэты iнтарэс — узаемны. Перспектыўнымi беларускi лiдар лiчыць сумесныя праекты ў галiне прамысловасцi i сельскай гаспадаркi. Паводле яго слоў, цяпер беларускi бок актыўна прапрацоўвае пытанне закупак у Алтайскiм краi пшанiцы цвёрдых сартоў, якую ў рэспублiцы вырасцiць складана.

Паводле яго слоў, у свой час супрацоўнiцтва Беларусi з рэгiёнамi Расiйскай Федэрацыi «выратавала Саюз дзвюх краiн». «Мы не мелi б цяпер такiх блiзкiх адносiнаў», — адзначыў кiраўнiк дзяржавы.

На сустрэчы акрамя пытанняў двухбаковага ўзаемадзеяння Беларусi i Алтайскага края iшла размова i аб ходзе будаўнiцтва Саюзнай дзяржавы. Паводле слоў Аляксандра Лукашэнкi, нягледзячы на тое, што сёння ў саюзным будаўнiцтве шмат робiцца, па шэрагу напрамкаў iдзе тармажэнне. Ён падкрэслiў, што Беларусь па-ранейшаму прыхiльнiца iдэй iнтэграцыi, але ў пэўных пытаннях застаецца непахiснай. Так, наша краiна нiколi не ўвойдзе ў склад Расiйскай Федэрацыi. «Нам гэта не патрэбна, Беларусь — самадастатковая краiна», — сказаў прэзiдэнт.

Яшчэ адна прынцыповая пазiцыя кiраўнiцтва нашай краiны датычыцца праблемы ўвядзення адзiнай валюты на тэрыторыi Беларусi i Расii. Аляксандр Лукашэнка лiчыць, што «нельга ставiць калёсы паперадзе каня», i пытанне валюты неабходна прапiсаць у Канстытуцыйным акце Саюзнай дзяржавы, якi будзе прымацца на рэферэндуме.

«Мы не з’яўляемся працiўнiкамi Саюза, як некаторыя гавораць. Наадварот, сёння ўвесь свет падзелены на саюзы, i за iмi — будучае», — адзначыў беларускi лiдар.

Пры гэтым ён падкрэслiў, што Беларусь не чакае ад Расii якiх-небудзь прэферэнцый. «Мы толькi хочам працаваць у эканомiцы як адна краiна», — сказаў прэзiдэнт.

Разам з тым, лiчыць кiраўнiк дзяржавы, расiйскi бок ставiць пад пагрозу выкананне дамоўленасцi аб стварэннi роўных умоў для суб’ектаў гаспадарання. Так, ужо сёння расiйскi газ на гранiцы Беларусi i Расii каштуе ў паўтара раза даражэй, чым, напрыклад, ён абыходзiцца прадпрыемствам Смаленска. Прэзiдэнт падкрэслiў, што Беларусь не супраць павышэння цаны на газ. Але такая ж цана на парытэтнай аснове павiнна быць устаноўлена i для суб’ектаў Саюзнай дзяржавы. Толькi ў тым выпадку можна гаварыць аб роўных умовах гаспадарання. I дагавор аб роўных умовах, нагадаў кiраўнiк дзяржавы, мае прыярытэтны характар адносна нацыянальных заканадаўстваў.

Закранаючы пытанне прыватызацыi ААТ «Белтрансгаз», Аляксандр Лукашэнка пацвердзiў, што беларускi бок не пойдзе на яго продаж па балансаваму кошту. Прыняць такiя ўмовы можна толькi пры згодзе Расii даць магчымасць Беларусi ўдзельнiчаць у распрацоўцы радовiшчаў вуглевадароднай сыравiны.

Гаворачы аб адносiнах расiян да Беларусi, губернатар падкрэслiў, што пераважная частка жыхароў Алтайскага края «з пашанай i павагай ставяцца да беларускага народа». I ўсе спробы СМI сказiць такое ўяўленне аб нашай рэспублiцы маюць толькi адваротны эфект.

Прэс-служба Прэзiдэнта Рэспублiкi Беларусь.