Магiлёў рыхтуецца да свята i фестывалю

Источник материала:

Нацыянальныя дыяспары Магiлёва прымуць удзел у «Свяце сяброўства». Кiраўнiцтва Магiлёва традыцыйна ўзнагародзiць лепшых гараджан прэмiяй «Дасягненне». На Савецкай плошчы ўрачыста адкрыюць мемарыяльныя дошкi выбiтным магiляўчанам.

3 лiпеня, калi ў 1941 годзе пачалася абарона Магiлёва i трымалася 23 днi, на знакамiтым Буйнiцкiм полi адбудзецца мiтынг памяцi. Але працягнецца ён у Буйнiчах святам жыцця, якi арганiзоўваюць для дзяцей i дарослых у новым комплексе «Беларуская вёска». Увогуле плануецца шмат забаўляльных мерапрыемстваў: цыркавое свята, лазернае шоу, спартыўныя спаборнiцтвы i маладзёжныя дыскатэкi.

У святкаваннях возьмуць удзел дэлегацыi гарадоў-пабрацiмаў Магiлёва i iншых беларускiх гарадоў. Для гасцей i ветэранаў гарвыканкам арганiзуе прыём у новым культурна-дзелавым цэнтры. Свята горада традыцыйна завершыць тэатралiзаванае шэсце «Магiлёў учора, сёння, заўтра» i феерверк.

— Людзi хочуць вiдовiшчаў, — пракаментавала планы гарадскога ўпраўлення культуры яго загадчыца Антанiна Шаркова. — I мы iмкнёмся дагадзiць i дарослым, i дзецям. Хочацца, каб магiляўчане атрымалi задавальненне ад яркага свята, якое запомнiцца. Але таксама радасна, што Магiлёў — гэта «прасунуты» горад, жыхары якога цэняць высокую музычную культуру. У гэтым пераконвае фестываль «Магутны Божа», якi пройдзе ў Магiлёве ў 14-ы раз!

Мiжнародны фестываль духоўнай музыкi «Магутны Божа» адкрыецца 28 чэрвеня i стане часткай агульнага свята Магiлёва. Паводле папярэдняй iнфармацыi, у iм сёлета возьмуць удзел прадстаўнiкi 7 краiн свету: госцi прыедуць з Польшчы, Расii, Украiны, Малдовы, Германii i нават з Кiтая. Духоўныя спевы будуць гучаць у Магiлёўскiм касцёле Святога Станiслава i на адкрытых пляцоўках горада. У рамках фестывалю выступiць народная артыстка СССР Алена Абразцова. А народны артыст СССР Вiктар Роўда па традыцыi ўзначалiць журы конкурсу фестывалю «Магутны Божа».