Алiмпiйскiя гульнi бываюць i «малымi»

Источник материала:

На адкрыццё спаборнiцтваў прыбыло нямала VIP-персон. Чаго толькi вартая прысутнасць былога малатабойца, алiмпiйскага чэмпiёна 1964 года ў Токiо Рамальда Клiма, якi не толькi запалiў «алiмпiйскi» агонь, але i блаславiў дзяцей на дасягненне высокiх вынiкаў! Выступленнi кiраўнiка раённай «вертыкалi» Мiхаiла Глiнскага i дэпутата Палаты прадстаўнiкоў Нацыянальнага сходу Уладзiмiра Дзялендзiка, якi прывёз удзельнiкам спартыўнага свята нямала каштоўных прызоў, насiлi ў нейкай ступенi патрыятычнае адценне. Прамоўцы адзначылi важнасць цяперашнiх стартаў з пункту гледжання здаровага ладу жыцця. Было падкрэслена, што спорт з «малога» мае ўласцiвасць перарастаць у «вялiкi». Улiчваючы зацiкаўленасць у гэтым росце прэзiдэнта краiны Аляксандра Лукашэнкi i яго падтрымку спорту ўвогуле, Мiхаiл Апанасавiч i Уладзiмiр Вiктаравiч пажадалi «алiмпiйцам» лёгкiх стартаў i далейшых поспехаў у спорце. У дапаўненне да свайго выступлення спадар Дзялендзiк запрасiў школьнiкаў на матч футбольнага клуба «Дарыда», што ўвасабляе ўвесь Мiнскi раён, з ФК «Гомель». Дзецi адказалi гучнымi апладысментамi i згодай. Гэтак жа бурна яны падтрымалi i лаўрэатаў Нацыянальнага алiмпiйскага камiтэта ад Мiнскай вобласцi. З рук яго прадстаўнiка — генеральнага дырэктара Генадзя Кецко i алiмпiйскага чэмпiёна-64 Рамуальда Клiма многiя школьнiкi атрымалi падарункi.

Малыя алiмпiйскiя гульнi Мiншчыны, у праграме якiх лёгкаатлетычная эстафета 4х100 метраў, скачкi з месца, стрытбол, прабiванне пенальцi, настольны тэнiс i шэраг iншых дысцыплiн пачынаючы з сённяшняга дня працягнуцца ў дзiцячых лагерах i школах. Лепшыя з лепшых, падкрэслiлi арганiзатары турнiру, будуць узнагароджаны каштоўнымi падарункамi i прызамi.

Кар. «Звязды».