«Адно акно» — дадатковая нагрузка

Источник материала:

На тэрыторыi Жамчужнага пасялковага Савета Баранавiцкага раёна знаходзяцца два буйныя сельгаспрадпрыемствы — птушкафабрыка «Дружба» i свiнакомплекс «Усходнi». А ў буйным пасёлку жадаючых аформiць нейкiя дакументы заўсёды больш, чым у невялiкай вёсачцы. А вось дзе прасцей атрымаць патрэбныя даведкi, яшчэ невядома.

Справа ў тым, што ў Жамчужны прыязджаюць супрацоўнiкi натарыяльнай канторы i агенцтва па рэгiстрацыi нерухомасцi, i раз у месяц чалавек можа аформiць дакументы на месцы, а не ехаць, як раней, у райцэнтр. Але такое шчасце выпала толькi некалькiм пасёлкам, якiя патрапiлi ў катэгорыю аграгарадкоў. Менавiта сюды i заглядваюць адпаведныя ўстановы, а ў астатнiх населеных пунктах сiтуацыя iншая.

I калi Жамчужны знаходзiцца непасрэдна пад Баранавiчамi, то Мiлавiды — за 40 км ад райцэнтра, i тут узнiкаюць дадатковыя цяжкасцi, бо аўтобусы ходзяць не з той перыядычнасцю, як хацелася б.

Сiтуацыю растлумачыла сакратар Мiлавiдскага сельскага Савета Тамара Блiнская.

— Сёння дакументамi грамадзян займаецца Савет. Мы афармляем патрэбныя паперы i вязём у Баранавiчы. Вось Кацярына Волчак вырашыла прадаць хату, i менавiта сельскi Савет дапамог старой зрабiць гэта. Праўда, «адно акно» лягло дадатковай нагрузкай на нашых супрацоўнiкаў, а нас тут усяго трое — старшыня, сакратар ды бухгалтар. Даводзiцца займацца i ваенным улiкам, i землеўпарадкаваннем, i падаткамi, рабiць запыты, сачыць за парадкам i выконваць бягучыя справы. Работы прыбавiлася, а штат застаўся ранейшым, але выбiраць не прыходзiцца — працуем.