У накiрунку да песень

Источник материала:

Фестывалi

Што гэта будзе за фэст, прасцей за ўсё патлумачыць, пералiчыўшы яго ўдзельнiкаў. Гэта «монстры» беларускай этнiчнай музыкi «Тройца» ды «Палац». Гэта гурт «Гуды» i дуэт «Яр», гэта фольк-праект гiтарыста колiшняга «Крывi» Пiта Паўлава, якi называецца вельмi проста «Pit Paff».

Дарэчы, Пiту Паўлаву належыць iдэя гэтага фестывалю. I тлумачыць яе з’яўленне музыкант так: «Уласна для мяне этнiчная музыка з’яўляецца камертонам, па якому я наладжваю сваю музычную iндывiдуальнасць. У сучасным свеце, дзе камп’ютар замянiў большасць звыклых, традыцыйных сродкаў камунiкацыi, гуказапiсу, а для шматлiкiх музыкантаў нават i музычныя iнструменты, я раю пiльна прыслухоўвацца да таго, як гучала музыка раней. I гэта дазваляе ў любы момант адчуваць грунт пад нагамi, заўсёды разумець як еднасць з сусветнымi музыкамi, так i сваю унiкальную беларускасць».

Ёсць людзi, якiя любяць сапраўдную музыку. Напэўна, яны будуць рады паслухаць яе там, адкуль яе звычайна прывозяць фалькларысты, — у глыбiнцы.

Дзе «Вольнага паветра» больш? Канешне, калi рухацца ў напрамку да родных краявiдаў, як мага далей ад вялiкага горада, дзе летам надта спякотна i дыхаецца даволi цяжка. Зусiм iншая справа — на беразе ракi Бобр, у старажытным беларускiм гарадку Крупкi.

Калi вы гатовыя туды паехаць, то збiрацца трэба з розумам. Такая музыка найбольш рамантычна гучыць ад заходу да свiтання. Канцэрт пачнецца ў восем гадзiн вечара 15 лiпеня i скончыцца а трэцяй гадзiне ранiцы. Сустрэць новы дзень прыемна ў добрай кампанii пад родную музыку. Асаблiва калi яна падаецца добрым гукам i з лепшым сцэнiчным асвятленнем, як абяцаюць арганiзатары. А яшчэ яны абяцаюць, што на гэтым усё не скончыцца i фестываль этнiчнай музыкi будзе адбывацца штогод, прычым кожны раз у новым месцы. I не трэба палохацца тых Крупак ноччу. Электрычкi на Оршу ходзяць даволi часта. Ад прыпынку «Новае жыццё» iсцi да пляцоўкi метраў 800 i ўвесь шлях будзе пазначаны, заблудзiць будзе цяжка. Ды i што там шукаць? З урочыша «Ластаўчыны гнёзды», дзе ўсё будзе праходзiць, хутчэй за ўсё будуць даносiцца беларускiя песнi. У накiрунку да iх i трэба рухацца.