Нацыянальная бiблiятэка атрымала першы падарунак па новым адрасе

Источник материала:

— Цяпер многае адбываецца ўпершыню, — сказаў дырэктар Нацыянальнай бiблiятэкi Раман Матульскi, — упершыню ў гэтай зале мы атрымлiваем падарунак, i падарунак гэты ад самых блiзкiх нашых сяброў — ад Пасольства Расiйскай Федэрацыi.

У новым будынку Нацыянальная бiблiятэка працуе тры тыднi, яна мае 19 чытальных залаў i 14 мiльёнаў палiц, з якiх запоўнена толькi восем мiльёнаў. Падарункi з’яўляюцца адной з крынiц папаўнення фондаў бiблiятэкi i складаюць 22 працэнты ад усiх паступленняў. Менавiта Пасольства Расiйскай Федэрацыi, а таксама расiйскiя выдавецтвы i кнiгагандлёвыя арганiзацыi зрабiлi большую iх частку. Сёлета бiблiятэцы ўжо было падорана 548 найменняў кнiг са стэнда «Кнiгi Расii» на VIII кнiжнай выставе-кiрмашу «Кнiгi Беларусi-2006». За мiнулы год Расiйскае пасольства розным арганiзацыям, школам i бiблiятэкам Беларусi перадала ў дар 300 тысяч экзэмпляраў кнiг — гэта колькасць роўная фонду абласной бiблiятэкi.

— Самае каштоўнае тое, што гэта вельмi запатрабаваныя кнiгi, — заўважыў намеснiк мiнiстра культуры Рэспублiкi Беларусь Валерый Гедройц.

Усе гэтыя кнiгi з’яўяляюцца ўзорам высакаякаснай палiграфii. «Нам ёсць чаму вучыцца, — прызнаўся намеснiк мiнiстра iнфармацыi Рэспублiкi Беларусь Iгар Лапцёнак. — Расiяне задаюць нам высокую планку i дзякуй iм за гэта. Каб паспяваць за расiйскiмi палiграфiстамi, канешне, трэба пераабсталяваць нашы выдавецтвы. Але я ўпэўнены, што хутка i мы будзем рабiць так». Намеснiк мiнiстра меў на ўвазе не толькi якасць кнiг, але i iх колькасць.

Затое што датычыцца самой бiблiятэкi, яе будынка, — тут беларусы перагналi i расiян, i iншыя краiны СНД. Пра гэта з захапленнем казаў Надзвычайны i Паўнамоцны Пасол Расiйскай Федэрацыi ў Рэспублiцы Беларусь Аляксандр Сурыкаў.