«Паляванне на лiхачоў»

Источник материала:

Як паведамiла старшы iнспектар упраўлення ДАI Мiнiстэрства ўнутраных спраў Ганна Банадык, прафiлактыка супраць «лiхачоў» праводзiцца ў сувязi з усплёскам аварыйнасцi па iх вiне. Сёлета кожнае пятае дарожна-транспартнае здарэнне адбылося менавiта з-за перавышэння хуткасцi вадзiцелямi транспартных сродкаў. Прычым усе аварыi мелi цяжкiя наступствы.

Каб астудзiць пыл «лiхачоў», Дзяржаўтаiнспекцыя будзе актыўна выкарыстоўваць сучасныя сродкi фота- i вiдэафiксацыi парушальнiкаў. Нагадаю, што зараз на ўзбраеннi ДАI ёсць прылады «Iскра-Кадр», якiя iмгненна выяўляюць транспартныя сродкi, што перавысiлi хуткасць. Гэтыя прылады эфектыўна працуюць нават у той момант, калi аўтамабiль Дзяржаўтаiнспекцыi рухаецца па дарозе ў агульнай плынi.

Дарэчы, у момант правядзення прафiлактычных мерапрыемстваў некаторыя машыны ДАI будуць «замаскiраваны» пад цывiльныя аўтамабiлi, на iх не будзе характэрнай мiлiцэйскай афарбоўкi i проблескавых маячкоў.

А ў Мiнску «лiхачоў» чакае яшчэ адзiн дадатковы «сюрпрыз». У сталiцы ўжо завершана ўстаноўка сiстэмы «Арэна», якая вымярае хуткасць i фiксуе на фота парушальнiкаў. Здымкi перадаюцца ў рэжыме рэальнага часу супрацоўнiкам дарожна-патрульнай службы, якiя прымаюць меры да «лiхачоў». Пакаранне можа знайсцi «героя» i праз некалькi дзён. У архiве «Арэны» змяшчаецца да 10 тысяч здымкаў, на якiх дакладна пазначаны нумар транспартнага сродку i яго хуткасць. ДАI нагадвае, што за паўторнае на працягу года перавышэнне хуткасцi больш чым на 20 кiламетраў у гадзiну вадзiцель можа быць пазбаўлены правоў на тэрмiн ад 6 да 12 месяцаў.

Паводле звестак Дзяржаўтаiнспекцыi, прылады «Арэна» ў блiжэйшы час будуць устаноўлены ва ўсiх абласных цэнтрах i буйных гарадах Беларусi. Так што i за межамi сталiцы «лiхачам» вельмi цяжка будзе схавацца ад пiльных «вачэй» электронных памочнiкаў ДАI.