Аўтааматар

Источник материала:

Рубрыку вядзе Мікола ДЗЯБЁЛА

ГАЛАВАЛОМКА З КАРОБКАЙ

Хачу купiць аўтамабiль. Ужо нават знайшоў, як мне здаецца, добры «варыянт». Але знаёмы раiць мне не набываць гэты аўтамабiль, бо ў iм аўтаматычная каробка перадач, якая, паводле яго слоў, вельмi ненадзейная. Ён раiць купляць машыну з механiчнай каробкай. А вы як лiчыце?

Таццяна Прокушава, г. Салiгорск.

Цяжка даць адназначны адказ. Механiчная каробка пераключэння перадач (КПП), сапраўды, лiчыцца самай простай i надзейнай. Праўда, для нявопытных вадзiцеляў яна не такая камфортная i зручная, як аўтаматычная. Звычайны «аўтамат» пераключае перадачы па зададзенаму вадзiцелем алгарытму руху. Апошнiм часам з’явiлася некалькi тыпаў АКПП. Напрыклад, аўтаматычная каробка «Tiptronic» мае яшчэ ручную функцыю пераключэння перадач. На некаторых аўтамабiлях устаноўлены каробкi «Easytronic». Фактычна яна нiчым не адрознiваецца ад механiчнай каробкi, за выключэннем таго, што перадачы пераключае не вадзiцель, а электрапрывад. Перавагi АКПП над «механiкай» у тым, што яны робяць аўтамабiлi вельмi дынамiчнымi. Аднак «аўтаматы» вельмi моцна залежаць ад умоў эксплуатацыi, iх рамонт значна даражэйшы.

ТРЭСНУЛА ШКЛО...

На лабавым шкле майго аўтамабiля трэшчына. Цi прайду я тэхнiчны агляд?

Сяргей Ланскi, г. Полацк.

Усё залежыць ад таго, у якiм месцы трэснула шкло. Прачытайце ўважлiва Правiлы дарожнага руху (ПДР). Паводле патрабаванняў ПДР, транспартны сродак не можа ўдзельнiчаць у дарожным руху, калi лабавое шкло з боку вадзiцеля мае трэшчыны ў зоне, якая ачышчаецца «дворнiкамi». Ва ўсiх астатнiх выпадках, вам наўрад цi варта хвалявацца, што не пройдзеце тэхагляд.

Аўтапрам

БЕРАЖЛIВЫ МАЗ

Мiнскi аўтазавод прадставiў навiнку — МАЗ-551608 з прычэпам для перавозкi сыпучых грузаў.

Грузападымальнасць гэтага беражлiвага МАЗа — 20 тон. Па жаданню заказчыка на iм можа быць устаноўлены размеркавальнiк падагрэву платформы або тэнт.

Аўтакур’ёз

ЗАПЛАЦI АЛIМЕНТЫ I ЕДЗЬ СПАКОЙНА

У Латвii за ўхiленне ад выплаты алiментаў, магчыма, не будуць выдаваць вадзiцельскае пасведчанне.

Такiя радыкальныя меры барацьбы са злоснымi неплацельшчыкамi алiментаў прапаноўвае мiнiстэрства па справах сям’i i дзяцей. Зараз больш за 11 тысяч латышоў не выконваюць свае бацькоўскiя абавязкi па ўтрыманню дзяцей. Сярод «ухiлiстаў» — 256 жанчын. Каб аказаць цiск на такiх гора-бацькоў, чыноўнiкi згаданага мiнiстэрства прапануюць ужо з наступнага года забаранiць выдачу вадзiцельскiх правоў неплацельшчыкам алiментаў, а таксама пазбавiць iх магчымасцi прайсцi тэхагляд. Ёсць i больш радыкальная прапанова: увогуле забаранiць «злосным ухiлiстам» набываць новыя аўтамабiлi.