Сярэбраны гiпацэнтаўр у чырвоным полi
Барыс ПРАКОПЧЫК
Далёкае — блiзкае Указам Прэзiдэнта Рэспублiкi Беларусь Аляксандра Лукашэнкi нададзены афiцыйны статус геральдычным сiмвалам шэрагу тэрытарыяльных адзiнак Гродзенскай вобласцi. Гэтым дакументам зацверджаны сцяг Гродна, гербы i сцягi гарадоў Шчучын, Масты, Ашмяны, гарадскога пасёлка Вялiкая Бераставiца i Бераставiцкага раёна, гарадскога пасёлка Воранава i Воранаўскага раёна, а таксама вёскi Гальшаны Ашмянскага раёна.Дарэчы, Гальшаны — гэта першая вёска на Гродзеншчыне, якае мае свой герб. Гiстарычным падмуркам для яго стварэння сталi родавыя гербы былых уладальнiкаў мястэчка — Гальшанскiх i Сапегаў. Ён уяўляе сабой варажскi шчыт з выявай гiпацэнтаўра ў чырвоным полi — мiфiчнай фiгуры каня сярэбранага колеру з галавой, грудзьмi i рукамi чалавека. У руках гiпацэнтаўра (з герба Гальшанскiх) — залаты лук са стралой з сярэбраным апярэннем, якая паражае пашчу дракона на канцы хваста ў каня. А ў нiжняй канцавой частцы герба Гальшан размешчаны герб Сапегаў «Лiс» — сярэбраная, двойчы перакрыжаваная страла на блакiтным фоне. Герб абласнога цэнтра — алень святога Губерта з жоўтым крыжом памiж рагамi, якi пераскоквае цераз агароджу, быў заснаваны ў 1994 годзе. А цяпер Гродна мае i свой сцяг (палотнiшча блакiтнага колеру з гербам горада ў цэнтры). У геральдычных сiмвалаў кожнай тэрытарыяльнай адзiнкi — свае гiстарычныя каранi. Скажам, чаму ў аснову сучаснага герба гарадскога пасёлка Вялiкая Бераставiца i Бераставiцкага раёна ўзялi вавёрку чырвонага колеру з залатой дваранскай каронай над ёй? Падставай для гэтага сталi выяўленыя ў Нацыянальным гiстарычным архiве Беларусi ў Гродне дакументы аб дараваннi жыхарам Бераставiцы 2 жнiўня 1754 года магдэбургскага права i герба. Дык вось, вышэйзгаданыя элементы (вавёрка i шляхецкая карона) упрыгожвалi герб на тагачаснай гарадской пячатцы. Герб горада Шчучына ўяўляе сабой барочны шчыт з залатой каронай у блакiтным полi, а пад ёй — сярэбраная манаграма Сцыпiёнаў: «I» i «S». Iгнацiй Сцыпiён быў адным з уладальнiкаў мястэчка i ў 1761 годзе атрымаў каралеўскi прывiлей на магдэбургскае права — гарадское самакiраванне i гандаль. Своеасаблiва выглядае герб горада Масты. У верхнiм чырвоным полi варажскага шчыта — залаты мост, у нiжнiм блакiтным — плыт з шасцi бярвёнаў сярэбранага колеру. Не пераблытаеш з iншымi i герб горада Ашмяны. Гэта французскi шчыт, дзе ў правым чырвоным полi — рука, якая трымае залатыя вагi, у левым блакiтным — залаты шчыт, а ў нiжнiм сярэбраным — цяля чырвонага колеру як элемент родавага гербу Панятоўскiх. А вось пры стварэннi герба гарадскога пасёлка Воранава i Воранаўскага раёна выкарыстаны элементы родавых гербаў Гаштольдаў i Сцыпiёнаў, якiя ў мiнулым доўгi час уладарылi на гэтых землях. Сучасны герб мае форму iспанскага шчыта. У верхнiм блакiтным полi — залаты леў з залатой каронай, што трымае ў лапах сярэбраную лiтару «W», у нiжнiм чырвоным адлюстраваны герб «Сцыпiён» — чатыры перакрыжаваныя бэлькi блакiтнага колеру. Паводле iнфармацыi загадчыка аддзела па архiвах i справаводству Гродзенскага аблвыканкама, члена Тапанiмiчнай камiсii пры Савеце Мiнiстраў Беларусi Яўгена Жабруна, цяпер iдзе праца па заснаванню гербаў i сцягаў Гродзенскай вобласцi i горада Свiслач.
Чтобы разместить новость на сайте или в блоге скопируйте код:
На вашем ресурсе это будет выглядеть так
Указам Прэзiдэнта Рэспублiкi Беларусь Аляксандра Лукашэнкi нададзены афiцыйны статус геральдычным сiмвалам шэрагу тэрытарыяльных адзiнак Гродзенскай в
|
|