«Пажарнiкi» атрымалi па «заслугах»

Источник материала:

На працягу 10 гадоў гэтыя бандыты наводзiлi жах на прадпрымальнiкаў, якiя гандлявалi на гомельскiм рынку. Злачынцы аблажылi бiзнэсменаў «данiнай». А з нязгоднымi плацiць «аброк» сурова распраўлялiся: падпальвалi iх гандлёвыя аб’екты, аўтамабiлi, жыллё. Менавiта таму злачынная арганiзацыя i атрымала назву «Пажарнiкi».

Апроч рэкета бандыты займалiся рабаўнiцтвам, махлярствам, сутэнёрствам, збiвалi i гвалтавалi людзей. Усяго на рахунку «Пажарнiкаў» больш за 100 злачынстваў. Суд над бандай пачаўся 22 лiстапада мiнулага года i працягваўся 7 месяцаў. Судовай калегii па крымiнальных справах Гомельскага абласнога суда была праведзена велізарная праца: было апытана 257 удзельнiкаў крымiнальнага працэсу. I вось якi прысуд вынеслi слугi Фемiды. Паводле звестак рэспублiканскай Пракуратуры, удзельнiкi злачыннай арганiзацыi атрымалi ў залежнасцi ад ступенi вiны ад 3 да 14 гадоў пазбаўлення волi.

Аднак ставiць кропку ў справе «Пажарнiкаў» яшчэ рана. Да нядаўняга часу 14 членаў гэтай банды, у тым лiку i яе лiдары, хавалiся ад правасуддзя. Дзякуючы эфектыўнаму супрацоўнiцтву з расiйскiмi калегамi на тэрыторыi РФ нядаўна ўдалося затрымаць 7 членаў гэтай злачыннай арганiзацыi. Прычым, шасцёра бандытаў аселi ў Падмаскоўi i «тэрарызавалi» беларускiх гастарбайтэраў: вымагалi ў землякоў грошы.

Зараз у мiждзяржаўным вышуку знаходзяцца 7 «Пажарнiкаў».