Юр’еў дзень

Источник материала:

Футбол

Некаторыя мае калегi пасля фiнальнага свiстка казалi, што ўдачу нашай камандзе прынесла салiстка «Топлес» Насця Касянкова, якая ўпершыню завiтала на футбол. Аднак настаўнiк беларускай дружыны Юрый Пунтус на прэс-канферэнцыi знайшоў сваё тлумачэнне: «Пасля двух паражэнняў ад галандцаў i румынаў нашым iгракам было цяжка гуляць далей псiхалагiчна, матч са славенцамi стаў сапраўдным выпрабаваннем i нашы футбалiсты справiлiся з iм. Магчыма, дапамагло тое, што перад гульнёй мы схадзiлi ў царкву. Наогул лiчу, што зборная змагалася, як сапраўдная каманда: нездарма ж на табло прозвiшчы тых, хто забiў галы, пачыналiся на лiтару К (Коўба, Карніленка і Карыцька). У гэтым я для сябе ўгледзеў фiласофскi сэнс».

Галоўнага трэнера зборнай Славенii Бранка Облака журналiсты папрасiлi параўнаць нашу «нацыяналку» з той, з якой ужо давялося двойчы мерацца сiламi (абедзве сустрэчы завяршылiся з лiкам 1:1). Ён сказаў, што беларусы сталi мацней, а магчыма, яны так выглядаюць на полi з-за нявопытнасцi i маладосцi яго падначаленых. Калi ж тыповае пытанне задалi Юрыю Пунтусу, ён адказаў дыпламатычна: «Раз раней лiк быў 1:1, а зараз 4:2 на нашу карысць, пэўна, каманда стала сапраўды мацней».

Многiх цiкавiла, як беларускi настаўнiк растлумачыць iнцыдэнт з Максiмам Рамашчанкам (пасля замены маскоўскi дынамавец адразу адправiўся ў падтрыбуннае памяшканне). Юрый Iосiфавiч пракаментаваў яго так:

— Я не прыхiльнiк такiх паводзiнаў, але асуджаць Рамашчанку не стану, бо, на маю думку, стадыён ён пакiнуў пад уплывам эмоцый. Iгрок такога класа заўжды хоча дапамагчы камандзе, а калi яго замяняюць у сярэдзiне матча i не дазваляюць гэта зрабiць, успрымае замену занадта эмацыянальна. Аднак я бачыў радасць Максiма пасля нашай перамогi. Нiякага парушэння дысцыплiны ў нашым калектыве няма.

Наконт кругу гонару экс-капiтана зборнай Сяргея Гурэнкі ў канцы свайго 80-га матча, быццам ветэран развiтваўся з балельшчыкамi, Юрый Пунтус выказаў надзею, што футбалiст да нас яшчэ вернецца: «Калi ён вырашыў зноў выступаць за зборную, сказаў, што згуляе толькi ў двух матчах, але я лiчу, што так ён проста перастрахоўваўся, бо яму ж 34 гады, ён яшчэ ў аснове маскоўскага «Лакаматыва».

Героем матча i цудоўным форвардам, безумоўна, настаўнiк назваў Сяргея Карнiленку, якi забiваў такiя важныя галы. Наконт варатара Уладзiмiра Гаева было сказана, што за прапушчаныя мячы ў Бухарэсце і ў Мінску яму трэба зрабiць скiдку, бо галкiпер яшчэ не мае вялiкага вопыту гульнi за зборную — «перагарэў». Асноўнай жа праблемай абароны Юрый Iосiфавiч назваў пропуск галоў са стандартаў. Цудоўна яшчэ б было дадаць хуткасцi i падключыць iнсайдаў, але пакуль хочацца толькi радавацца за нашу зборную i яе трэнера, бо Юрыя Пунтуса мы ведаем як аднаго з лепшых футбольных беларускiх спецыялiстаў. Нарэшце, настаў i яго дзень.

ВЫНIКI МАТЧАЎ У IНШЫХ ГРУПАХ. «А»: Казахстан — Фiнляндыя — 0:2, Сербiя — Арменiя — 3:0, Польшча — Партугалiя — 2:1, Бельгiя — Азербайджан — 3:0; «В»: Украiна — Шатландыя — 2:0, Грузiя — Iталiя — 1:3, Францыя — Фарэры — 5:0; «С»: Мальта — Венгрыя — 2:1, Турцыя — Малдова — 5:0, Боснiя i Герцагавiна — Грэцыя — 0:4; «D»: Iрландыя — Чэхiя — 1:1, Славакiя — Германiя — 1:4, Уэльс — Кiпр — 3:1; «Е»: Андора — Македонiя — 0:3, Расiя — Эстонiя — 2:0, Харватыя — Англiя — 2:0; «F»: Iсландыя — Швецыя — 1:2, Лiхтэнштэйн — Данiя — 0:4, Паўночная Iрландыя — Латвiя — 1:0.