На байкераў вучыць... БРСМ

Источник материала:

Акцыя папулярная не толькi сярод мясцовай моладзi. Прыязджаюць i з суседнiх раёнаў, i нават са сталiцы. Зараз пры Пухавiцкiм камiтэце БРСМ ствараюць клуб маладых матацыклiстаў. Але, па сутнасцi, аб’яднанне аматараў матораў iснуе пад эгiдай саюза моладзi ўжо больш за тры гады.

— У кожным раёне з лiку моладзi знойдзецца шмат аматараў матацыклаў. Але звычайна маладыя людзi ездзяць па вулiцах без патрэбных дакументаў, не прытрымлiваюцца Правiлаў бяспекi i не ведаюць правiлаў дарожнага руху. Таму разам з начальнiкам раённай дзяржаўтаiнспекцыi i пры дапамозе дарослых прафесiйных механiкаў, вопытных вадзiцеляў Беларускi саюз моладзi вырашыў згуртаваць моладзь, каб яна вучылася, як правiльна кiраваць матацыклам, як яго рамантаваць, — растлумачыла першы сакратар раённага камiтэта ГА «БРСМ» Альфiя Яўфiмава.

I яшчэ адна, галоўная прычына з’яўлення незвычайнага «гуртка», як вызначае Альфiя Яўфiмава, звязана з iмкненнем да таго, каб моладзь праводзiла свой вольны час за цiкавай справай, набывала карысны вопыт. «Частка нашай моладзi нядбайна бавiць вольныя гадзiны — без мэты ходзiць па вулiцах, часам злоўжывае шкоднымi звычкамi. А трэба, каб малады чалавек займаўся карыснай для сябе i для грамадства справай. I дзейнасць аматарскага клуба з’яўляецца адным з вiдаў такой работы», — падкрэслiвае першы сакратар Пухавiцкага камiтэта БРСМ.

Дапамагаюць Беларускаму саюзу моладзi дарослыя энтузiясты. Алег Яскевiч яшчэ некалькi гадоў таму з радасцю ўспрыняў свежую iдэю. Зараз ён i яго дарослыя калегi працуюць з любым маладым чалавекам, якi выказаў намер стаць матацыклiстам, навучыцца рамантаваць тэхнiку.

— Ведаеце, я разумею, наколькi неабходна сёння маладому чалавеку мець карыснае хобi. Я нарадзiўся ў «праблемнай» сям’i, сваiм бацькам быў не вельмi патрэбен. I тады не ведаў, чым заняцца, як знайсцi сваё месца ў жыццi. I памятаю, як сусед узяў мяне за руку i запiсаў у мотаклуб. Магчыма, гэта дапамагло мне тады пераадолець жыццёвыя цяжкасцi, — падзялiўся ўспамiнамi Алег. — Таму мы працуем з усiмi падлеткамi, i яны ўдзячныя нам, паважаюць, я нават магу сказаць — раўняюцца на нас.

Дарэчы, сярод аматараў сустракаюцца не толькi прадстаўнiкi моцнага полу. Не так даўно на чарговым моташоу правы атрымала дзяўчына, якая прыехала з суседняга Чэрвеня на матацыкле «Усход». Дарэчы, тэхнiка бяспекi пры правядзеннi выездаў матацыклiстаў вельмi жорсткая. Падлеткi не самi прыязджаюць на сваiх матацыклах — iх прывозяць дарослыя, якiя маюць правы. Усе апранутыя ў шлем i спецыяльнае адзенне. Iнспектары ДАI выпiсваюць дакумент катэгорыi «А» толькi лепшым, астатнiя атрымлiваюць у падарунак ад мiлiцыянераў Правiлы дарожнага руху. Пераможцы ж моташоу дораць шлем. Акрамя таго, маладыя матацыклiсты ўдзельнiчаюць у раённых мерапрыемствах. Напрыклад, ужо некалькi гадоў запар калона маладых байкераў (каля ста чалавек) у суправаджэннi мiлiцыянераў прымае ўдзел у святкаваннi Дня перамогi, iншых гарадскiх святах.