Жанчыне патрэбны ўвага i мiр на зямлi

Источник материала:

Абласное аддзяленне БСЖ, якое ўзначальвае начальнiк упраўлення сацыяльнай абароны Магiлёўскага аблвыканкама Ганна Апет, цяпер налiчвае больш за 30 тысяч жанчын. За справаздачныя пяць гадоў колькасць членаў Саюза жанчын у вобласцi павялiчылася на 10 тысяч.

На канферэнцыi ў Магiлёве прагучала, што жаночая арганiзацыя ў поўны голас заявiла аб сабе, i не толькi ў сэнсе выключна жаночых iнтарэсаў. Жанчыны сёння маюць усе правы i доступы да любых пасад, з’яўляюцца паўнавартаснымi членамi грамадства i лiчаць сваiм поспехам дзяржаўную палiтыку, якая арыентавана на сацыяльную абарону жанчыны i мацi.

Тым не менш, хапае сёння i праблем, у вырашэннi якiх Беларускi саюз жанчын мае намер браць актыўны ўдзел. Жанчыны лiчаць галоўнымi з iх сiроцтва, алкагалiзм, факты гвалту i жорсткасцi ў сям’i, дыскрымiнацыю жанчын на рынку працы, нестабiльнасць шлюбаў i гэтак далей. Яны плануюць працаваць у сацыяльных прытулках i праблемных сем’ях, а таксама на прадпрыемствах i ў арганiзацыях, каб праз калектыўныя дамовы абаранiць iнтарэсы працоўных жанчын. Жанчыны будуць праводзiць дабрачынныя акцыi на карысць дзяцей i маламаёмасных сем’яў.

Удзел у магiлёўскай канферэнцыi прыняла Надзея Ермакова, лiдар Беларускага саюза жанчын. Яна на «выдатна» ацанiла дзейнасць Магiлёўскага аддзялення БСЖ i дадала, што жанчыны ва ўсiх рэгiёнах працуюць вельмi добра.

— Беларускi саюз жанчын стаў iнiцыятарам абвяшчэння Года Мацi i свята Мацi i мацярынства, — сказала Надзея Андрэеўна. — I сёння ўжо нiкога не трэба нi ўгаворваць, нi прасiць з гэтай нагоды: кiраўнiкi, улады ўсiх узроўняў звярнулi ўвагу на тое, што трэба займацца мацярынствам. I наш Прэзiдэнт Аляксандр Лукашэнка падтрымаў нашы iдэi наконт абвяшчэння Года Мацi.

— Беларускай жанчыне ў першую чаргу патрэбен спакой i мiр на зямлi, — мае сваё меркаванне Надзея Ермакова. — Каб навокал не ваявалi, тады i наша жанчына была б спакойная, бо ведала б, што да нас не прыйдзе гэта праблема, i нашым хлопцам не давядзецца ехаць у «гарачыя кропкi». А ўсё астатняе яна ўжо ўмее арганiзаваць, асаблiва ў нашай дзяржаве, дзе створаны эканамiчная, палiтычная i сацыяльная асновы для жыцця.