Каб было зручна дзецям, нязручнасцi давядзецца цярпець дарослым

Источник материала:

«Гарачы» тэлефон «Звязды 287-17-41

— Змяненнi раскладу руху аўтобуснага маршруту «Слуцк—Шалавiчы» былi выклiканы неабходнасцю падвозу дзяцей у дзве школы па шляху руху аўтобуса — у вёсках Серагi i Знамя, — патлумачыў начальнiк аддзела перавозак i кантролю даччынага ўнiтарнага прадпрыемства «Аўтобусны парк № 2 г. Слуцка» Анатоль Мяцельскi. — Нас, у прынцыпе, гэты маршрут таксама не задавальняе, i мы разумеем, што людзям нязручна, але па рашэнню райвыканкама аўтапарк абавязаны падвозiць школьнiкаў. Дарэчы, не толькi ў названыя сярэднiя школы, але i яшчэ ў дзве музычныя.

Як расказаў далей Анатоль Вiктаравiч, раённы аддзел адукацыi сам мае шэсць аўтобусаў для перавозу школьнiкаў, аднак абслугоўваць школы ў вёсках Серагi i Знамя не бярэцца, маўляў, транспарту не хапае. З iншага боку, адмаўляецца i заключыць дагавор, i плацiць за арганiзацыю маршруту самому аўтапарку, як было некалькi гадоў таму.

— А мы ж зацiкаўлены ў прыбытку, ды i каб зручна для людзей было, — падкрэслiў Анатоль Мяцельскi. — Калi б не школьнiкi, адразу б перайшлi на ранейшы расклад руху.

— Але ўсе шэсць аўтобусаў загружаны па поўнай праграме, — парыруе намеснiк загадчыка раённага аддзела адукацыi Аляксандр Шыловiч. — Яны не толькi падвозяць школьнiкаў, але i абслугоўваюць iншыя мерапрыемствы, напрыклад, вываз навучэнцаў на нейкiя спаборнiцтвы.

Паводле слоў Аляксандра Шыловiча, сёлета да пачатку навучальнага года адна са школ раёна — Леднiнская — ужо атрымала аўтобус. Наступны ў лепшым выпадку будзе праз год. «Аднак нават у гэтым выпадку я не ўпэўнены, што гэта дазволiць вырашыць сiтуацыю».

Якое выйсце са становiшча? Перанесцi пачатак заняткаў у школах з 9 на 8 гадзiн ранiцы, як рытарычна заўважыў Анатоль Мяцельскi? Гэтага не дазволяць зрабiць санiтарныя нормы, слушна заўважыў Аляксандр Шыловiч. Падаецца, нязручнасцi са змяненнем раскладу руху аўтобуса «Слуцк—Шалавiчы» вяскоўцам давядзецца цярпець i далей...