«Няма куды збыць бульбу...»

Источник материала:

«Гарачы» тэлефон «Звязды» 287-17-41

— Напачатку нешта наша раённае спажывецкае таварыства яшчэ закупляла, а цяпер нiхто не хоча браць, — гаварыў Уладзiмiр Цiмафеевiч. — Калiсьцi расiяне былi ў нас частымi гасцямi, бралi бульбы шмат, добра плацiлi. А сёлета i iх няма. Кажуць, забаранiлi iм браць беларускую бульбу, бо яшчэ не завершана яе закладка на мiжсезонны перыяд унутры краiны. Цi праўда гэта? У мяне ёсць на продаж 4—5 тон бульбы, але каму яе прадаць? Мне i суседзям?

Паводле слоў начальнiка аддзела па вытворчасцi i гандлю плодаагароднiннай прадукцыяй i бульбай Мiнiстэрства сельскай гаспадаркi i харчавання Таццяны Карбановiч, нiякiх забарон на продаж бульбы насельнiцтвам, на якiя спасылаецца наш чытач, нiхто не ўводзiў. А закладка «другога хлеба» ў стабiлiзацыйныя фонды ў краiне ўжо завершана. Больш падрабязную iнфармацыю прадаставiў рэдакцыi загадчык аддзела нарыхтовак Брэсцкага аблспажыўсаюза Анатоль Падгайскi.

— Сёлета ў Расii адпускныя цэны на бульбу склалiся больш танныя, чым нашы закупачныя. I яны ўжо нам гатовы прадаваць «другi хлеб» па таму кошту, па якому i мы прымаем яго ў насельнiцтва. Але ж нiхто прадукцыю па цане, нiжэйшай за сабекошт, браць не будзе, пагадзiцеся, — сказаў Анатоль Вячаслававiч.

Паводле яго слоў, сёлета вобласць заклала на захоўванне 2574 тоны бульбы, або 108,5 працэнта ад задання. «Мы маглi б браць бульбу ад насельнiцтва i надалей, але куды яе потым падзець»? Выйсце для чытача тут, напэўна, толькi адно (па гэтаму шляху iдуць многiя вяскоўцы): пакласцi клубнi на захоўванне дома, а ўжо ўвесну паспрабаваць яе здаць нарыхтоўшчыкам, прычым па больш высокiх закупачных цэнах. Праўда, можа паўстаць пытанне: а як бульба, з улiкам сёлетнiх умоў надвор’я, будзе захоўвацца? Ёсць рызыка, канешне. З iншага боку, Анатоль Падгайскi выказаў здзiўленне, чаму чытач толькi зараз ачомаўся, бо актыўная нарыхтоўка, у тым лiку i бульбы, вялася ў жнiўнi—вераснi.