Беларускiх дзяцей прышчапляюць французскай вакцынай

Источник материала:

— Для правядзення бясплатнай iмунiзацыi асоб высокай рызыкi развiцця постгрыпозных ускладненняў, а таксама асоб з групы высокай рызыкi iнфiцыравання грыпам Мiнiстэрствам аховы здароўя было закуплена сёлета 595 тысяч доз iнакцiвiраванай вакцыны для дарослых расiйскай вытворчасцi (гэта не «Грыпол». — Н.Н.) i каля 200 тысяч доз iнакцiвiраванай французскай грыпознай вакцыны «Ваксiгрып» для дзяцей, — заспакоiла нашых чытачоў намеснiк галоўнага ўрача Рэспублiканскага цэнтра гiгiены, эпiдэмiялогii i грамадскага здароўя Надзея СЕБУТ. — Паколькi вакцына для дарослых паступiла ў Беларусь раней за дзiцячую, то на сёння мы прышчапiлi ўжо больш за палову «дарослага» кантынгенту ад запланаванага. Нiякiх трывожных сiгналаў аб выяўленнi нейкiх пабочных эфектаў пры прымяненнi вакцыны да нас не паступала. Усе вакцыны мы набываем толькi на тэндарнай аснове, пры гэтым бярэцца пад увагу бяспечнасць вакцыны, яе эфектыўнасць i цэнавы фактар. Французская вакцына «Ваксiгрып», якой мы прышчапляем нашых дзяцей ужо не першы год, адпавядае ўсiм гэтым патрабаванням. Яна не ўтрымлiвае жывых вiрусаў, вызначаецца высокай ступенню ачысткi i добра пераносiцца. Процiпаказаннем для прышчэпкi з’яўляецца наяўнасць алергii на курыныя яйкi, паколькi вiрусы для вакцыны вырошчваюцца на курыных эмбрыёнах, а таксама павышаная тэмпература цела. Апошнi фактар, дарэчы, з’яўляецца процiпаказаннем для любой прышчэпкi.