Будучыя мiнiстры ведаюць, што трэба рабiць

Источник материала:

«Сумленным, цярплiвым, патрабавальным не толькi да калег, але i да сябе, лаяльным i ўмець размаўляць на адной мове з людзьмi», — такiм павiнен быць кiраўнiк, лiчыць адзiн з удзельнiкаў студэнцкай навукова-практычнай канференцыi «Тэарэтыка-метадалагiчныя i прыкладныя аспекты дзяржаўнага кiравання ў Рэспублiцы Беларусь i за мяжой».

Ужо адзiнаццаты раз студэнты з розных ВНУ не толькi нашай краiны, але i Расii, Украiны i Казахстана збiраюцца разам i вырашаюць праблемы дзяржаўнага кiравання. За гэты час у канферэнцыi ўдзельнiчалi 3300 студэнтаў. Сёлета на яе сабралiся прадстаўнiкi 25 ВНУ Беларусi i Маскоўскага дзяржаўнага ўнiверсiтэта iмя Ламаносава.

— У Беларусi дзяржаўнае кiраванне — маладая сфера адукацыi i навуковых даследаванняў, — гаворыць рэктар Акадэмii кiравання, доктар юрыдычных навук, прафесар Станiслаў Князеў. — Мне вельмi прыемна, што менавiта яна прываблiвае маладых i перспектыўных вучоных.

Пра цiкаўнасць маладых сведчыць тое, што на канферэнцыю было заяўлена 412 студэнцкiх дакладаў. Але для ўдзелу ў ёй адабралi толькi 198.

— На маю думку, такiя канферэнцыi дазваляюць завесцi новыя кантакты, пазнаёмiцца з цiкавымi людзьмi, якiя падзяляюць твае iнтарэсы, у дадзеным выпадку — гэта дзяржкiраванне, — тлумачыць Мiхаiл Стараў, студэнт МДУ iмя М. Ламаносава. — Да таго ж, калi ты сам выступаеш, гэта дапамагае сфармуляваць думкi, адказаць на пытаннi. Я быў на шматлiкiх канферэнцыях, як на прафесарскiм узроўнi, так i на студэнцкiх, чуў процьму дакладаў i прэзентацый, але сёння мяне вельмi ўразiлi выступленнi хлопцаў з Мiнскага вышэйшага авiяцыйнага каледжа.

— Гэта цудоўная магчымасць для нашых масцiтых вучоных паглядзець, як моладзь успрымае iх даследаваннi i ўнесцi ў гэтыя даследаваннi нейкiя карэктывы, — лiчыць старшыня аргкамiтэта канферэнцыi Сяргей Хажэмпа, дырэктар Iнстытута дзяржаўнага кiравання Акадэмii кiравання пры Прэзiдэнце Рэспублiкi Беларусь.

— Я па-добраму зайздрошчу тым, хто ўдзельнiчаў у канферэнцыi, — прызнаўся студэнтам прарэктар Акадэмii кiравання Iгар Ганчаронак. — Усё пачынаецца са студэнцтва: тыя iдэi, якiя нараджаюцца, як правiла, нараджаюцца менавiта ў студэнцкай аўдыторыi. I яны генеруюцца менавiта ў вашым узросце, i таму Акадэмiя кiравання кожны год збiрае вас, каб гэтыя iдэi пачуць. А потым прымянiць на практыцы дзяржаўнага кiравання.