Адмена ўсынаўлення

Источник материала:

Сын у 19 гадоў ажанiўся з жанчынай з дзiцем, якога ён усынавiў. Тым не менш пражылi яны ў згодзе ўсяго пяць гадоў, а потым развялiся. Па рашэнню суда ён плацiць алiменты на яе сына, але ж гэта не яго дзiця. Раскажыце, як можна адмянiць усынаўленне.

Зiнаiда Р., г. Гомель.

Падставамi для адмены ўсынаўлення з’яўляюцца ўхiленне ўсынавiцеля ад выканання ўскладзеных на яго абавязкаў, злоўжыванне бацькоўскiмi правамi, жорсткае абыходжанне з усыноўленым дзiцем, захворванне ўсынавiцеля хранiчным алкагалiзмам або наркаманiяй. Суд мае права адмянiць усынаўленне i па iншых прычынах зыходзячы перш за ўсё з iнтарэсаў дзiцяцi i з улiкам меркавання дзiцяцi, якое дасягнула ўзросту дзесяцi гадоў.

Пры адмене ўсынаўлення ўзаемныя правы i абавязкi ўсыноўленага дзiцяцi i ўсынавiцеля спыняюцца i ўзнаўляюцца правы i абавязкi дзiцяцi i яго бацькоў, калi гэтага патрабуюць iнтарэсы дзiцяцi. Суд таксама вырашае пытанне, цi захоўваюцца за дзiцем прысвоеныя яму ў сувязi з усынаўленнем уласнае iмя, iмя па бацьку i прозвiшча, дата i месца нараджэння. Пры гэтым iх змяненне ў дзiцяцi, якому споўнiлася дзесяць гадоў, магчыма толькi з яго згоды. Адмена ўсынаўлення не дапускаецца, калi на момант прад’яўлення патрабавання аб гэтым усыноўлены дасягнуў паўналецця, за выключэннем выпадкаў, калi на такую адмену маецца ўзаемная згода ўсынавiцеля i ўсыноўленага дзiцяцi, а таксама бацькоў усыноўленага дзiцяцi, калi яны жывыя, не пазбаўленыя бацькоўскiх правоў або не прызнаныя судом недзеяздольнымi.

Калi ўсынавiцель мэтай адмены ўсынаўлення ставiць пазбаўленне ад абавязкаў па выплаце алiментаў, то неабходна заўважыць, што часткай пятай артыкула 140 Кодэкса РБ аб шлюбе i сям’i прадугледжваецца, што суд, зыходзячы з iнтарэсаў дзiцяцi, мае права абавязаць былога ўсынавiцеля выплачваць сродкi на ўтрыманне дзiцяцi ў адпаведнасцi з прадугледжанымi гэтым Кодэксам нормамi для маёмасных абавязкаў бацькоў у адносiнах да сваiх дзяцей.