Магчымасцi для «чаргавiкоў» пашырылiся

Источник материала:

Першыя станоўчыя вынiкi рашэння аб дадатковым крэдытаваннi ўжо ёсць. Начальнiк упраўлення жыллёвай палiтыкi камiтэта будаўнiцтва i жыллёвай палiтыкi Мiнскага гарадскога выканаўчага камiтэта Мiкалай Ком расказаў, што ў лiк «шчаслiўцаў» (тых чаргавiкоў, хто мае права на льготнае крэдытаванне) трапiлi людзi, якiм патрэбна палепшыць жыллёвыя ўмовы i якiя стаялi на адпаведным улiку i былi ўключаны ў графiк будаўнiцтва i фiнансавання на 2006 год. Крэдыт змогуць атрымаць i грамадзяне «льготнай катэгорыi», якiя ў гэтым годзе збiраюцца набываць жыллё або ажыццяўляць яго рэканструкцыю. Дарэчы, рашэнне датычыцца ўсiх, хто стаiць на чарзе ў любой арганiзацыi — i ў адмiнiстрацыях раёнаў, i па месцы працы, у тым лiку ў жыллёва-будаўнiчых кааператывах. Умова пры атрыманнi льготнага крэдыту — сярэднямесячны сукупны даход на кожнага члена сям’i не павiнен перавышаць два мiнiмальныя спажывецкiя бюджэты.

— Колькасць усiх сталiчных сем’яў, якiя жадаюць мець жыллё, узрасла, а гэта ўжо тэндэнцыя. У 2004 годзе iх было 139 тысяч, сёлета ўжо каля 180 тысяч, з улiкам тых, хто ўжо атрымаў кватэру сёлета, — кажа Мiкалай Ком. — Тлумачыцца гэта i прыняццем новага жыллёвага заканадаўства — катэгорыя грамадзян, якiя падпадаюць пад льготнае жыллё, пашырылася. Чарга пачала «драбнiцца» — дзецi дасягаюць паўналецця i самастойна становяцца на ўлiк.

Грамадзян, якiя жадаюць пры дапамозе дзяржавы вырашыць жыллёвае пытанне, можна падзялiць на дзве часткi. Першая група — сацыяльна неабароненыя: iнвалiды i ветэраны вайны, сiроты, людзi, якiя маюць складаныя формы хранiчных захворванняў, зараз да спiсу далучылi i шматдзетных матуль, якiя выхоўваюць траiх i больш дзяцей, iншых асоб, чый даход не перавышае бюджэту пражытачнага мiнiмуму. Гэтыя людзi могуць разлiчваць на сацыяльнае жыллё. Але ёсць i мiнусы такога падарунка ад дзяржавы — жыллёвае памяшканне нельга пакiнуць у спадчыну, прыватызаваць, аддаць у карыстанне, напрыклад, уласным дзецям. Таму некаторыя грамадзяне з гэтай групы адмаўляюцца ад «сацыяльнай кватэры» i намагаюцца пабудаваць уласную.

Другая, i самая вялiкая частка грамадзян — гэта амаль 600 тысяч сем’яў па ўсёй краiне. Як паведамiў Мiкалай Ком, у раённых адмiнiстрацыях Мiнска пачалося будаўнiцтва жылля для тых, хто стаў на ўлiк да 1987 года. «Адзначу, што льготныя крэдыты выдзяляюцца зараз грамадзянам, якiя стаяць на ўлiку па агульнаму спiсу i сталi членамi ЖБК да пачатку 1993 года. Аднаразовыя субсiдыi выдаткоўваюцца для тых, хто прыняты на ўлiк да 1 студзеня 1987 года. Тут мы паднялi планку на тры гады наперад», — паведамiў суразмоўца.

Дарэчы, будаўнiцтва жылля для тых, хто стаiць на чарзе ў працоўным калектыве, iдзе больш хуткiмi тэмпамi. У арганiзацыях на ўлiку зараз стаiць 18 тысяч, у адмiнiстрацыях раёнаў — 40 тысяч сем’яў, якiя маюць права атрымаць iльготны крэдыт да канца гэтага года.