Цеплыня правакуе дрэвы «выкiдваць» пупышкi

Источник материала:

— Такой працяглай анамальнай плюсавай тэмпературы мы сапраўды не можам прыгадаць. Калi браць нейкiя ранейшыя гады, дык i тады часам удзень назiралiся даволi высокiя тэмпературы паветра, аднак уначы яны панiжалiся да мiнусавай адзнакi, што давала магчымасць пладовым культурам пераходзiць у стан вымушанага спакою. Натуральны спакой звычайна не вельмi працяглы, а вымушаны надыходзiць якраз з пачаткам халадоў, марознага надвор’я. Цяпер жа i ўдзень, i ўначы назiраюцца плюсавыя тэмпературы. Што гэта азначае? Натуральны спакой ужо скончыўся, а пайсцi ў вымушаны культуры не могуць. Адсюль i набуханне на дрэвах пупышак. Асаблiва iх зараз шмат, напрыклад, на бружмелю (жимолости) — самай ранняй культуры, — сказала Надзея Рыгораўна.

Паводле далейшых слоў спецыялiста, прагназаваць зараз нейкi магчымы ўрон i страты ў садах рана — усё будзе залежаць ад далейшых паводзiнаў прыроды. Зразумела, небяспеку ўяўляюць найперш маразы, калi яны раптоўна абрынуцца на дрэвы. У гэтым выпадку могуць пацярпець у першую чаргу ўсе костачкавыя — вiшня, алыча, чарэшня, iнш., паколькi па сваёй бiялогii вегетацыя ў iх пачынаецца нашмат раней, чым у iншых дрэў — калi яшчэ зямля прамерзлая. Але i тут не ўсё так проста. Маразы пры наяўнасцi снегу, якi прыкрывае каранёвую зону, пладовыя культуры могуць перанесцi значна лепш, чым без снегавога покрыва. Цi можна нейкiм чынам дапамагчы зараз дрэвам?

— Калi выпадзе снег, пажадана прыкрыць iм каранёвую зону. Садаводы робяць гэта заўсёды. Але цi будзе карысць... Такi крок не нашкодзiць адназначна, паколькi снег — гэта вiльгаць, якая можа спатрэбiцца дрэву ў далейшым, — зазначыла Надзея Капiчнiкава. — Але праблема зараз у тым, што глеба не замерзла... Таму зрабiць нейкiя прамежкавыя высновы наконт уплыву цяперашнiх умоў надвор’я на пладовыя дрэвы мы зможам крыху пазней, у залежнасцi ад таго, як будзе развiвацца сiтуацыя.