Першыя ахвяры паляўнiчага сезона

Источник материала:

Паколькi наперадзе шмат святаў з багатымi застоллямi, з рознымi прысмакамi, эпiдэмiёлагi раяць з асцярогай ставiцца да прыгатавання i паядання страў з мяса.

Трыхiнiлёз — захворванне, якое выклiкаецца дробнымi лiчынкамi трыхiнелы. Яны вызначаюцца асаблiвай устойлiвасцю да неспрыяльных фактараў. Нi варка, нi смажанне, нi вэнджанне, нi саленне ў поўнай меры не вызваляюць мясапрадукты ад гэтых гельмiнтаў. Сiмптомы захворвання звычайна з’яўляюцца праз 2—4 тыднi з моманту заражэння, але могуць з’явiцца i праз некалькi дзён. Усё залежыць ад атрыманай дозы ўзбуджальнiка i ўстойлiвасцi арганiзма. Пры гэтай хваробе высокая тэмпература (да 39 0С i вышэй), з’яўляюцца мышачныя болi iкраножнай вобласцi i ацёкi павек, твару. Часам да сiмптомаў далучаюцца скурныя высыпкi i кiшэчныя расстройствы. Ступень цяжкасцi вельмi разнастайная — ад лёгкiх i сцёртых формаў да цяжкiх ускладненняў, якiя, бывае, заканчваюцца смерцю.

Што ж трэба ведаць i якiя правiлы захоўваць, каб пазбегнуць заражэння трыхiнiлёзам?

Нельга набываць прадукты харчавання (у дадзеным выпадку мясапрадукты) у невядомых асоб па-за дзяржаўнымi пунктамi гандлю. Купляючы мяса ў камерцыйных лаўках i палатках, патрабуйце даведку аб ветэрынарным даследаваннi прадуктаў.

Неабходна таксама клапацiцца аб захаваннi здароўя жывёлы на ўласным падворку. Памяшканнi, у якiх утрымлiваецца свойская жывёла, павiнны быць абаронены ад пранiкнення грызуноў. Перыядычна — вясной i восенню — трэба знiшчаць пацукоў i мышэй у жылых i прысядзiбных пабудовах. Нельга скормлiваць свойскiм свiнням трупы загiнулых дзiкiх жывёл, а адходы паляўнiчага промыслу — толькi пасля папярэдняй ветэрынарнай экспертызы.

Яшчэ адна мера прафiлактыкi. Трэба абавязкова праводзiць паслязабойную ветэрынарную экспертызу туш свойскiх свiней i жывёл i толькi пасля гэтага ўжываць iх мяса ў ежу. Прычым для правядзення такой экспертызы не трэба везцi ў ветэрынарную службу ўсю тушу — дастаткова ўзяць пробу мышачнай тканкi (з ножак, дыяфрагмы, мiжрэберных, шыйных, жавальных або iкраножных мышц) вагой не больш як 50 грамаў. Акрамя таго, для зручнасцi насельнiцтва кiраўнiцтва ветэрынарнай службы рэспублiкi з 2001 года прыцягвае для правядзення трыхiнеласкапiчнай экспертызы ветэрынарных урачоў жывёлагадоўчых гаспадарак, а для збору проб мясапрадуктаў i цэнтралiзаванай iх дастаўкi ў ветэрынарныя лабараторыi — ветэрынарных фельчараў гаспадарак.

Варта ведаць, што калi вет- службамi ў пробах мяса выяўлены трыхiнiлёз, то, згодна з дзеючым ветэрынарным заканадаўствам, такая туша канфiскуецца i знiшчаецца, грошы за яе не вяртаюцца, даецца толькi даведка, што тавар канфiскаваны. «Таму, — кажа А. Ведзянькоў, — мы раiм людзям, якiя бяруць на адкорм свiней, страхаваць жывёлу. Гэта будзе гарантыяй таго, што ў падобнай сiтуацыi магчыма вярнуць хоць бы частку грошай».

I яшчэ. Даследаваць мяса не позна i праз тыдзень пасля ўжывання ў ежу свежаніны. Калi знойдуцца лiчынкi трыхiнел, захворванне можна будзе прадухiлiць, своечасова звярнуўшыся ў медыцынскую ўстанову, дзе прызначаць прафiлактычнае лячэнне. Галоўнае — не спяшайцеся ўсаджваць гасцей за мясны стол, каб потым не было бяды.