Нядзельныя школы здзiвiлi сваiм майстэрствам

Источник материала:

У першым конкурсе ўдзел бралi толькi прыходы сталiцы, але вынiкi аказалiся настолькi цiкавымi, што наступны раз геаграфiя яго будзе пашырана да межаў Мiнскай епархii. На другi дзень новага, 2007 года, дыплом пераможцаў Мiтрапалiт Мiнскi i Слуцкi Фiларэт, Патрыяршы Экзарх усяе Беларусi ўручыў навучэнцам нядзельнай школы Свята-Мiкольскага прыхода ў Шабанах. Але на самай справе вылучыць кагосьцi было няпроста, бо работы ўсiх дзетак аказалiся вельмi цiкавыя. Таму вырашана, што лепшыя малюнкi адправяцца на выставу ў Маскоўскi Крэмль, лепшыя харавыя калектывы выступяць на Мiнскiм гарадскiм фестывалi сучаснай хрысцiянскай музыкi «Благавест», а лепшыя тэатральныя калектывы зацiкавiлi галоўнага рэжысёра Тэатра юнага гледача...

Конкурс нядзельных школ стаў галоўным адкрыццём сёлетняй выстаўкi «Ражджаство Хрыстова», але не адзiным. Работа выстаўкi-кiрмашу арганiзавана так, што кожны наведвальнiк, у якi б час ён нi прыйшоў, знаходзiць тут нешта асаблiвае для сябе. Гэтаму садзейнiчае i насычаная асветнiцкая праграма, i вельмi прыгожая экспазiцыя. Штодзень а 11-й i 15-й гадзiнах дзетак чакаюць канцэртныя праграмы. А палове пятай праходзяць канцэрты дзiцячых вакальных i iнструментальных калектываў — лаўрэатаў i дыпламантаў фестывалю «Благавест» i вядучых аматарскiх калектываў Мiнска.

У рамках выстаўкi адбываюцца таксама мастацкiя i фотаэкспазiцыi, вечарыны духоўнай паэзii, гутаркi са святарамi. Для дзяцей i дарослых дэманструюцца кiнафiльмы духоўнай тэматыкi (4 снежня адбудзецца паказ фiльма «Востраў» Паўла Лунгiна), ладзяцца прэзентацыi кнiг, знаёмствы з прадстаўнiкамi буйнейшых манастыроў, сустрэчы з праваслаўнымi шматдзетнымi сем’ямi.

Рэдакцыя духоўна-асветнiцкай газеты «Воскресение» падрыхтавала ўласныя канцэртныя праграмы i семiнар «Вопыт арганiзацыi праваслаўнага дзiцячага лагера».

Традыцыйна на праваслаўнай выстаўцы-кiрмашы арганiзаваны майстар-класы па розных вiдах дэкаратыўнай творчасцi. Майстры тут дзеляцца сакрэтамi ткацтва, шыцця з абрэзкаў, разьбы па дрэву, ганчарнай справы, пляцення з лазы i вырабу берасцяных сувенiраў.

Як звычайна, тут можна набыць мёд i iншыя вырабы пчалярства. Шмат страў, прычым усе — посныя, прапанавана ў раздзеле «Трапеза». Свята-Елiсавецiнскi манастыр, якi займае вялiкую частку экспазiцыi, зрабiў для дзетак шалаш, у якiм частуе маленькiх гасцей чаем з мёдам i iншымi прысмакамi. Увогуле экспазiцыя каляднай выстаўкi атрымалася надзвычай цiкавай i прыгожай, сапраўды — святочнай.

Кiрмаш, падрыхтаваны выставачным таварыствам «Экспафорум» i Мiнскiм епархiяльным упраўленнем Беларускай праваслаўнай царквы, праходзiць па адрасу: праспект Пераможцаў, 14. Ён будзе працаваць да 5 студзеня.