Пенсiйныя «льготы» — за кошт мэтавых узносаў

Источник материала:

У прыватнасцi, чакаецца, што фiнансаванне пенсiйных «iльгот» будзе выведзена з агульнай пенсiйнай сiстэмы i аплачвацца за кошт iншай крынiцы — мэтавых страхавых узносаў работадаўцаў па накапляльнай схеме. Пры гэтым, як паведамiла начальнiк галоўнага ўпраўлення пенсiйнага забеспячэння i сацыяльнага страхавання Мiнiстэрства працы i сацыяльнай абароны Валянцiна Каралёва, адпаведны законапраект ужо распрацаваны, накiраваны ў Палату прадстаўнiкоў Нацыянальнага сходу i не выключана, што ён будзе разгледжаны на вясновай сесii парламента.

Апроч таго, адзначыла Валянцiна Каралёва, да 2010 года мiнiстэрства мае намер выступiць з прапановай аб пераходзе вылiчэння пенсiй зыходзячы не з заробку, а з аб’ёму выплачаных узносаў на пенсiйнае страхаванне. Такiм чынам, з’явiцца магчымасць больш аб’ектыўна ўлiчваць уклад кожнага чалавека ў фiнансаванне пенсiйнай сiстэмы. А гэта дазволiць прыйсцi да большай дыферэнцыяцыi ў памерах пенсiй. Такая дыферэнцыяцыя iснуе i зараз. Сёння мiнiмальная працоўная пенсiя ў краiне складае 135 тыс., а максiмальная пенсiя непрацуючых пенсiянераў — 454 тыс. рублёў. Аднак, заўважыла Валянцiна Каралёва, пакуль адрозненнi ў памерах выклiкаюць шмат незадавальнення, асаблiва з боку пенсiянераў, са значным працоўным стажам і вялiкiм заробкам. Праўда, тут жа варта зрабiць адну iстотную агаворку. Паводле слоў Валянцiны Каралёвай, новы падыход да разлiку пенсiй будзе датычыцца толькi будучых пенсiянераў. Пенсii цяперашнiм пенсiянерам працягнуць разлiчваць па ранейшых правiлах.

Разам з тым у Беларусi не плануецца змянення пенсiйнага ўзросту. А таксама (прынамсi, у блiжэйшы час) змены самой пенсiйнай сiстэмы нашай краiны — з размеркавальнай на накапляльную. Так, зазначыла Валянцiна Каралёва, нiхто i нiдзе ў свеце пакуль не змог даказаць, што чыстыя накапленнi — мадэль iдэальная. Да таго ж не сакрэт: абавязковай умовай накапленняў з’яўляецца высокая ступень развiцця фiнансавых рынкаў. У адваротным выпадку накапляльныя пенсiйныя сродкi будуць паступова «згараць».

Мiж тым, зараз у органах па працы i сацыяльнай абароне атрымлiваюць пенсii 2,4 млн чалавек, з якiх 97 працэнтам прызначаюцца працоўныя, а 3 працэнтам — сацыяльныя пенсii. Пры гэтым за мiнулы год сярэдняя пенсiя ў Беларусi павялiчылася амаль на трэць — з 211 да 277,8 тыс. рублёў. Адначасова рэальныя, з улiкам змянення цэн на тавары i паслугi, пенсii ўзраслi на 119,8 працэнта. I падобная тэндэнцыя павiнна захавацца надалей. У прыватнасцi, паводле ацэнак мiнiстэрства, да канца 2010 года сярэдняя рэальная пенсiя павiнна павялiчыцца не менш чым у паўтара раза.