Мiкалай ДАМАШКЕВIЧ: «Вынiкi года станоўчыя»

Источник материала:

Аднак на дасягнутым спыняцца не трэба. Мiкалай Дамашкевiч падчас вынiковага пасяджэння кiруючых кадраў вобласцi падкрэслiў, што ў новым годзе трэба звярнуць увагу на прыцягненне рэзерваў:

— На 2007 год планы зацверджаны. Аб’ёмы i патрабаваннi больш вялiкiя, чым летась, таму ўсiм нам трэба працаваць, удасканальваць сiстэму кiравання дзеля дасягнення запланаванага. Адна з крынiц паспяховай дзейнасцi — выкарыстанне рэзерваў прамысловай i сельскагаспадарчай вытворчасцi. Напрыклад, Мiншчына вырабляе малака столькi ж, як дзве iншыя вобласцi нашай краiны. Аднак грошай ад яго перапрацоўкi мы атрымлiваем менш, чым астатнiя рэгiёны. Мы можам зарабiць на продажы i перапрацоўцы малака на 62 мiльярды рублёў больш. Гэта толькi адзiн прыклад, як магчыма павялiчыць прыбытак. Таму задача для ўсiх — працаваць на поўную моц, задзейнiчаць свой iнтэлект i энергiю. Камандай кадраў вобласцi я задаволены, таму галоўнае — за плённай дзейнасцю, — расказаў Мiкалай Дамашкевiч.

Адным з галоўных дасягненняў работы вобласцi за 2006 год старшыня Мiнаблвыканкама лiчыць паспяховае забеспячэнне праграмы харчовай бяспекi. «Сельскагаспадарчыя прадпрыемствы вобласцi «кормяць» горад-герой Мiнск. 50 працэнтаў мяса i мясных прадуктаў, 66 працэнтаў малочных вырабаў, якiмi гандлююць у сталiцы, забяспечвае Мiншчына, — падкрэслiў Мiкалай Дамашкевiч. — Акрамя таго, на нас ляжыць адказнасць i за забеспячэнне прадуктамi жыхароў вобласцi. Палова насельнiцтва Беларусi атрымлiвае харчовыя тавары з Мiнскай вобласцi?».

У 2007 годзе яшчэ большую ўвагу трэба звярнуць i на вырашэнне праблем чалавека. «Мы ўдзячныя ўсiм нашым людзям, якiя падтрымлiваюць i дапамагаюць рэалiзоўваць планы. Калi б мы нi звярнулiся да настаўнiкаў, школьнiкаў, пенсiянераў, да тых, хто працуе на прадпрыемствах — заўсёды яны падтрымлiвалi i дапамагалi. Дырэктыва № 2 , наша сумленнасць i адказнасць абавязваюць прыслухоўвацца да праблем чалавека i працаваць дзеля яго, — кажа Мiкалай Дамашкевiч. — Таму ўвага да людзей, да iх надзённых праблем — гэта галоўнае. Ад iх самаадчування, добрага настрою, дабрабыту залежыць развiццё вобласцi i краiны».

Такiм чынам, вобласць у новым годзе будзе працягваць нарошчваць тэмпы свайго развiцця. Як упэўнены Мiкалай Дамашкевiч, «у нас атрымаецца ўсё, што намечана».