Сельсавет у электронным варыянце

Источник материала:

АДНО АКНО

афармленне патрэбных папер — справа неабходная, аднак не зусiм, так бы мовiць, «камфортная». Так думалi многiя яшчэ пэўны час таму. I мелi рацыю, паколькi цi не ў кожнага з нас быў асабiсты сумны вопыт пакутлiвага блукання па шматлiкiх чыноўнiцкiх кабiнетах з мэтай атрымаць «сваю паперу». Было зразумела, што працэдуру трэба не тое што спрашчаць, а кардынальна змяняць у iнтарэсах чалавека, радавога заяўнiка.

Перакулiць такую «пiрамiду» ўяўлялася амаль немагчымай справай. Аднак планы i надзеi на лепшае нарэшце пачалi ўвасабляцца ў жыццё. Пачатак быў пакладзены вядомым указам кiраўнiка дзяржавы № 432. Гэты дакумент з’явiўся ў вераснi 2005 года, з таго часу i разгарнулася дзейнасць па змяненню стылю работы дзяржаўных устаноў са зваротамi грамадзян. У сакавiку 2006-га ўказам №152 быў зацверджаны пералiк адмiнiстрацыйных працэдур, якiя выконваюцца рознымi ўстановамi, куды людзi звяртаюцца з пытаннямi па афармленню неабходных папер. Усяго дакументам акрэслена 414 адпаведных працэдур, якiя датычацца самых розных сфераў. Быў вызначаны максiмальны тэрмiн разгляду зваротаў людзей i выдачы патрэбных дакументаў, а таксама памер плацяжоў за тую цi iншую даведку.

Па сутнасцi, праз «адно акно» пачалася перабудова ўсёй сiстэмы па рабоце мясцовай улады з грамадзянамi. Цяпер шлях афармлення папер толькi пачынаецца ад заяўнiка (з моманту звароту), а далей да справы актыўна падключаюцца чыноўнiкi i дзяржаўныя ўстановы, прычым самых розных узроўняў. Удасканаленне сiстэмы — канешне, справа не аднаго дня i нават года, аднак ужо цяпер бачны пэўныя змяненнi.

— Многiя пытаннi зараз аператыўна i, галоўнае, эфектыўна вырашаюцца на месцы, — адзначае кiраўнiк справамi Мiнскага аблвыканкама Алег Крупенiн. — Распрацавана дакладная методыка рэалiзацыi прынцыпу «аднаго акна». Ёсць i неабходны iнструментарый — што i як рабiць на тым цi iншым узроўнi. Усе раённыя, гарадскiя, пасялковыя i сельскiя выканаўчыя камiтэты забяспечаны патрэбнымi метадычнымi рэкамендацыямi як у папяровым, так i ў электронным варыянтах. Складзены падрабязны каталог электронных адрасоў органаў мясцовага самакiравання, дзяржаўных устаноў.

Тэхнiчная база многiх сельскiх Саветаў аказалася непадрыхтаванай да кардынальных пераўтварэнняў. Пэўная iх колькасць увогуле не мелi электроннай тэхнiкi. Таму адным з першых крокаў на шляху ўкаранення прынцыпу «аднаго акна» на Мiншчыне стала сапраўдная «глабальная» камп’ютарызацыя. На гэта былi выдзелены значныя сродкi з абласнога бюджэту. Цяпер у кожным сельсавеце цэнтральнага рэгiёна ёсць камп’ютар — гэта, пагадзiцеся вялiкая справа. Таксама наладжана факсiмiльная i мадэмная сувязь. Вясковы «ўрад» падключаны да электроннай пошты дзяржаўных устаноў.

Для забеспячэння сельскiх i пасялковых выканкамаў электроннымi копiямi эталоннага банка даных прававой iнфармацыi з абласнога бюджэту выдзелена больш чым 12 мiльёнаў рублёў. Усе такiя меры скiраваны на адно — зрабiць працэдуру разгляду зваротаў грамадзян i афармлення патрэбных папер якаснай, аператыўнай i максiмальна зручнай для чалавека. Пры жаданнi можна многага дасягнуць, i гэтаму ўжо цяпер ёсць канкрэтнае пацвярджэнне. Узяць, да прыкладу, адну з традыцыйна вострых тэм — «камуналку». На многiх прадпрыемствах ЖКГ Мiнскай вобласцi патрэбныя даведкi могуць быць папярэдне заказаны жыхарамi (асабiста альбо нават па тэлефоне) з узгадненнем часу iх атрымання. Камунальнiкi прысталiчнага раёна пайшлi далей — неабходную паперу, заказаную па тэлефоне, пасля праверкi iнфармацыi чалавеку перасылаюць па пошце.

У Салiгорску працуе спецыяльны разлiкова-даведачны цэнтр, якi аказвае цэлы комплекс паслуг. На васьмi прадпрыемствах жыллёва-камунальнай гаспадаркi працуе адзiны асабiсты рахунак па «кватэрных» плацяжах. Яшчэ 10 «жылкантор» заключылi дагаворы з ААБ «Беларусбанк» аб выдачы iнфармацыi аб жыллёвых умовах, складзе сям’i для прадастаўлення льготных крэдытаў i г.д. Ва ўсiх ЖЭСах, якiя ўваходзяць у склад унiтарнага прадпрыемства «Жыллё», што працуе ў Барысаве, ёсць унутраная iнфармацыйная iнфраструктура кшталту карпаратыўнай сеткi. Такое «ноў-хау» зноў-такi дазваляе своечасова вырашаць надзённыя праблемы людзей.

Таксама i з зямельнымi пытаннямi. У Мiнскiм абласным агенцтве па дзяржаўнай рэгiстрацыi ўстаноўлена праграмнае забеспячэнне па кантролю за выкананнем заказаў, што прымаюцца праз «адно акно». Гэта дазваляе аператыўна праводзiць электронны абмен iнфармацыяй з праектным iнстытутам «Белгiпразем» i з iншымi землеўпарадкавальнымi арганiзацыямi. Каб больш хутка вырашаць патрэбныя пытаннi людзей, набыта 9 аўтамабiляў, якiя ў адпаведнасцi са спецыяльным графiкам абслугоўваюць усе «зямельныя» бюро Мiншчыны.

Такiм чынам, сэрвiс у шэрагу месцаў рэальна ўдасканальваецца. Гэта адзiн з «плюсаў» укаранення прынцыпу «аднага акна». Таксама як i павышэнне квалiфiкацыi адказных спецыялiстаў. Адначасова з паляпшэннем матэрыяльна-тэхнiчнай базы давялося арганiзоўваць iх навучанне.

— У першую чаргу гэта датычылася спецыялiстаў, якiя працуюць у сельскiх выканкамах, — адзначае Алег Крупенiн. — Менавiта на гэтым узроўнi кадрам востра не хапала патрэбнай квалiфiкацыi. Арганiзавалi спецыяльныя курсы, праз якiя пройдуць работнiкi 217 з 322 сельсаветаў Мiншчыны. Асобныя раёны (Нясвiжскi, Маладзечанскi, Стаўбцоўскi) наладзiлi навучанне на месцы. Упэўнены, што пасля такога масавага павышэння квалiфiкацыi адчувальна палепшыцца якасць работы, рэальная аддача. Усе ўзроўнi ўлады будуць працаваць па сучасных тэхналогiях. Для гэтага сёння створаны ўсе перадумовы.