Аляксандр СЕЛЯЗНЁЎ: «Кошт «панелек» для чаргавiкоў у сталiцы будзе не больш за 450 USD за кв. м»

Источник материала:

Паводле iнфармацыi мiнiстра архiтэктуры i будаўнiцтва Аляксандра Селязнёва, будаўнiкi выканалi прагнозныя паказчыкi ва ўсiх рэгiёнах краiны, за выключэннем Мiнска, дзе не было пабудавана 130 тысяч квадратных метраў запланаванага жылля, што склала мiнус 13 працэнтаў гадавога задання. Разам з тым у сельскай мясцовасцi i малых гарадах было пабудавана летась 1 млн 654,5 тысячы квадратных метраў жылля, або 130 працэнтаў гадавога плана.

Суразмоўца адзначыў, што летась цэментавыя заводы атрымлiвалi прыродны газ па кошту 73,5 долара за тысячу «кубоў». Пасля iстотнага падаражання расiйскага газу зараз кiраўнiцтва будаўнiчай галiны разлiчвае атрымлiваць гэта блакiтнае палiва, без улiку ПДВ, па кошту ў межах 126—128 долараў. Вядома, што доля цэменту ў структуры жыллёвага цэнаўтварэння складае толькi каля 2—2,5 працэнта. Менавiта таму, на думку мiнiстра, новая цана прыроднага газу павялiчыць кошт будаўнiцтва жылля толькi на 5—6 працэнтаў.

Аляксандр Селязнёў запэўнiў, што па будаўнiцтву жылля для тых, хто мае патрэбу ў паляпшэннi жыллёвых умоў, дзяржава будзе прытрымлiвацца раней вызначаных прыярытэтаў. Так, для гэтай катэгорыi грамадзян кошт квадратнага метра жылля ў дамах буйнапанельнага будаўнiцтва сёлета вызначаны ў межах 360—400 долараў, у цагляных дамах — 400—450. У сталiцы кошт жылля будзе крыху большым: у панельных дамах на працягу года — да 450 долараў, у цагляных — 520—550 долараў за квадратны метр.

Сёлета ў краiне запланавана пабудаваць 4 млн 700 тысяч квадратных метраў жылля. Толькi ў Мiнску сёлета неабходна ўвесцi ў эксплуатацыю 1 млн 70 тысяч квадратных метраў жылля. Разам з тым у 2007 годзе ў сталiцы будзе пабудавана 710—715 тысяч квадратных метраў жылля для тых, хто мае патрэбу ў паляпшэннi жыллёвых умоў.