Зуб балiць — нямiлы свет...

Источник материала:

Што ж мы ведаем пра зубны боль? Перш за ўсё тое, што боль увогуле — гэта засцерагальная рэакцыя нашага арганiзма. Зубны ж боль сiгналiзуе нам аб захворваннi тканак зуба, магчымым развiццi паталагiчнага працэсу з сур’ёзнымi ўскладненнямi, якiя могуць закрануць не толькi зубы i поласць рота, але i ўвесь арганiзм у цэлым.

Пры першых болевых адчуваннях трэба неадкладна iсцi на прыём да стаматолага. Толькi спецыялiст зможа зразумець прычыну болю i вылечыць хворы зуб. Аднак калi прыступ вострага зубнога болю здарыўся позна ноччу або ў выхадны дзень, калi звярнуцца ў кругласутачную стаматалагiчную палiклiнiку няма магчымасцi, шанц часова палегчыць пакуты ўсё ж ёсць — выкарыстаць рэцэпты народнай медыцыны.

 Паспрабуйце прыгатаваць спецыяльны зубны элiксiр: у шклянцы вады растварыце чайную лыжку солi i дабаўце 5—6 кропель ёду.Такi раствор змяншае раздражненне вакол тканак зубоў i здымае ацёк. Паласканне можа аблегчыць ваш стан, калi боль выклiканы запаленнем мяккiх калязубных тканак або рэшткамi ежы, якiя засталiся ў зубах.

 Загарнiце ў ручнiк некалькi кубiкаў лёду i прыкладзiце да шчакi. Холад звужае сасуды i змяншае ацёчнасць тканак.

 Вазьмiце кавалак прыроднага пропалiсу велiчынёй з гарошыну i пакладзiце ў карыёзную поласць хворага зуба. Каб пропалiс стаў мякчэйшым, папярэдне яго можна падагрэць.

 Калi ў вашай хатняй аптэчцы ёсць настойка валяр’яну або камфорнага спiрту, то яны таксама дапамогуць зняць зубны боль. Для гэтага ватны шарык, змочаны ў настойцы, трэба пакласцi ў поласць хворага зуба.

 Добра здымае боль адвар шалфею. Бярэцца сталовая лыжка шалфею на шклянку гатаванай вады i заварваецца. Рот паласкаць цёплым адварам, старацца як мага даўжэй трымаць адвар каля хворага зуба. Калi няма шалфею, такiм жа чынам можна выкарыстаць календулу, мяту.

 Вазьмiце скрылёк свiнога сала. Калi сала салёнае, соль неабходна счысцiць. Скрылёк пакладзiце на хворае месца, памiж дзясной i шчакой. Трымайце ў роце хвiлiн 15—20, пакуль не сцiхне боль.

 Для ўмацавання дзяснаў i ачышчэння зубоў ад налёту карысна жаваць мёд у сотах.

 Пры кроватачывасцi дзяснаў рэкамендуецца наступнае паласканне. Змяшаць 60 г кары дубу, 4 г лiпавага цвету. Чайную лыжку сухой здробненай сумесi залiць шклянкай кiпеню, даць настояцца 15—20 хвiлiн, працадзiць.

 Процiзапаленчым i болепатольным дзеяннем валодае настой мацярдушкi. Гатуюць яго ў суадносiнах 1:10 i выкарыстоўваюць для паласкання.

Пасля правядзення адной з вышэйзгаданых працэдур — калi пашанцуе! — магчыма, удасца паспаць. Аднак не забудзьцеся на наступны дзень схадзiць да стаматолага, бо толькi ён з’яўляецца лепшым сродкам ад зубнога болю.