Увесь вечар на манежы... хоць з пераломам

Источник материала:

Страсцi якiя

Так, лiтаральна днямi ў цырку адбыўся «страхавы выпадак». Падчас рэпетыцыi свайго нумара — эквiлiбрыстыка на ролiкавых каньках — 33-гадовая хатняя гаспадыня Вольга Баранская ўпала i... зламала копчык. Зараз яна штодня атрымлiвае абязбольваючыя лекi. Тым не менш, Вольга прыняла рашэнне працягнуць удзел у шоу i змагацца за галоўны прыз — што гэта будзе, арганiзатары пакуль не раскрываюць, але вядома, што кошт яго эквiвалентны 10 000 долараў ЗША.

Як расказаў «Звяздзе» галоўны прадзюсар праекта Сяргей Хомiч, ёсць траўмы i ў некаторых iншых удзельнiкаў «Зорнага цырка» — у прыватнасцi, двое з iх пацягнулi звязкi i ходзяць на прагоны лiтаральна заматаныя бiнтамi. Натуральна, усе 12 «рэалiцi-артыстаў» застрахаваныя на час здымак, i ў выпадку траўмiравання атрымаюць кампенсацыi, але болевых адчуванняў ад гэтага менш не робiцца. Тым не менш, выбываць з праекта i саступаць месца ўдзельнiкам з «лаўкi запасных» нiхто не збiраецца. «Думаю, справа ў той атмасферы, якая склалася на праекце, — лiчыць Сяргей Хомiч. — Нашы ўдзельнiкi добра прыжылiся, пасябравалi памiж сабой. Чым блiжэй да шоу, тым больш яны пачынаюць выкладвацца i рызыкаваць. Напрыклад, Вольга не толькi вырашыла застацца ў праекце, але нават ускладнiла свой нумар. Думаю, у агульным азарце проста не ўсе ўсведамляюць да канца, наколькi небяспечна тое, чым яны зараз займаюцца. Наташа Радзiна кормiць мядзведзя, i ёй падаецца, што ўсё ў парадку, кантакт усталяваны — а цыркавыя артысты тым часам трасуцца i перажываюць за яе, бо жывёлы ўсё ж непрадказальныя... Нашы ўдзельнiкi вучацца на ўласных памылках i гузаках, — але, паверце, нiводнага слабага нумара не будзе».

Уласна кажучы, у гэтым нiхто i не сумняваецца. Паводле слоў дырэктара Белдзяржцырка Таццяны Бандарчук, праект «Зорны цырк» выклiкаў вялiкую цiкавасць не толькi ў гледачоў i канкурсантаў, але таксама ў прафесiйных цыркавых артыстаў, трэнераў, работнiкаў сцэны i г.д. Бо гэта рэалiцi-шоу дае шанц не толькi ўдзельнiкам раскрыць свае таленты i набыць новыя ўменнi, але i майстрам паспрабаваць сябе ў ролi педагогаў i пацвердзiць уласны высокi ўзровень. Як гэта атрымаецца — убачым ужо зусiм хутка...