«Цэнтральны» стане сапраўды цэнтральным

Источник материала:

Сёлета ў сталiцы павiнны пачаць узвядзенне новага будынка «Цэнтральнага» — галоўнага аўтобуснага вакзала. Памяшканне, якое ёсць зараз, будзе знесена, замест яго з’явiцца сучасны шматузроўневы комплекс.

Месца знаходжання новага вакзала не зменiцца, аўтобусы будуць адпраўляцца прыблiзна з той жа тэрыторыi. Нават пасажырскiх платформаў пакiнуць столькi ж — чатырнаццаць. Аднак, напэўна, гэта адзiнае, што застанецца ў памяцi ад старога «Цэнтральнага». У астатнiм новы будынак будзе значна больш камфортным i зручным, i не толькi для людзей, якiя карыстаюцца аўтобуснымi рэйсамi. Нават часовая стаянка аўтобусаў, пасажырскiя пероны прыбыцця i адпраўлення ўпершыню у гiсторыi будуць знаходзiцца не ля вакзала, а непасрэдна пад «Цэнтральным». Для гэтага будынак пры дапамозе калон прыўзнiмуць, i на ўзроўнi зямлi ў цэнтры размесцяць пасажырскiя платформы.

— Участак, на якiм традыцыйна знаходзiўся сталiчны аўтобусны вакзал вельмi своеасаблiвай формы. Гэта стары «кавалак» горада, i мы хацелi б, каб новы будынак лагiчна ўпiсваўся ў архiтэктуру наваколля, працягваў фармiраванне Прывакзальнай плошчы — паведамiла галоўны архiтэктар праекта Iрына КАМЫШАН. — Разам з тым пры стварэннi будынка ўлiчаны i той факт, што раён аўтавакзала з’яўляецца шматлюдным месцам. Тут заўсёды было складана вырашыць праблему паркоўкi.

Таму на новым аўтавакзале створаць стаянку для машын. Шматузроўневы паркiнг на 500 месцаў будзе ўзведзены ўздоўж чыгуначных пуцей, ззаду новага будынка. Прызначаны ён будзе не толькi для пасажыраў, але для ўсiх, хто заедзе на тэрыторыю, прылягаючую да вулiцы Бабруйскай i Прывакзальнай плошчы. З кожнага ўзроўню паркiнгу можна будзе трапiць на паверхi вакзальнага комплексу.

Новы «Цэнтральны» з-за асаблiвасцяў свайго месцазнаходжання па знешняму выгляду будзе вузкiм, даўжыня яго складзе 256 метраў. А вось шырыня, як гэта нi дзiўна, звужаецца — з аднаго краю будынка будзе 130 метраў, з другога — ужо шэсцьдзесят. I вышыня таксама запланавана не аднолькавая — рознiца памiж правым i левым бакамi вакзала складзе больш за тры метры. А яшчэ ў знешнiм воблiку «Цэнтральнага» не будзе нiводнага вострага вугла! Ён нiбыта ляцiць, плыве над зямлёю.

— У нас i так мала сонечнага святла, таму мы жадалi, каб воблiк «Цэнтральнага» ствараў пачуццё прасторы. Адсутнасць вострых вуглоў таксама задума адмысловая — калi чалавек трапiць у будынак, яму будзе прыемна, што ён не натыкаецца ў вугал сцяны, i пры перамяшчэннi псiхалагiчна больш зручна iсцi з месца на месца плаўна, каб позiрку адчынялiся ўсё новыя, разнастайныя вiды», — патлумачыла Iрына Камышан. — Абцякальны вiд лепш выглядае ў агульным малюнку архiтэктуры забудовы раёна.

Новы «Цэнтральны» будзе створаны не толькi для пасажыраў аўтобусаў. Хутчэй за ўсё, ён запланаваны як комплекс, якi выконвае не толькi функцыю вакзала, але i дзелавую, гандлёвую, забаўляльную. На першым паверсе, акрамя «пустога месца» аўтобуснага перона, размесцяцца дробныя кропкi хуткага харчавання i гандаль. Другi паверх цалкам аддадуць пад гандлёвы цэнтр, памяшканнi ў якiм будуць здавацца прадпрымальнiкам у арэнду. Дзве трэцi плошчы наступнага ўзроўню запланаваны пад офiсы, i ў галоўнай частцы размесцiцца вялiкi рэстаран. У падвальным жа памяшканнi таксама запраектаваны яшчэ адзiн рэстаран — на гэты раз пiўны, з бiльярдным пакоем. Акрамя гэтага, у «Цэнтральным» будуць працаваць яшчэ i некалькi кафэ i iншых аб’ектаў грамадскага харчавання.

Памiж паверхамi можна будзе перамяшчацца па лесвiцах, эскалатарах, а таксама на лiфтах, у тым лiку i аглядных — з празрыстым шклом. Дарэчы, прадугледжаны ў дастатковай колькасцi яшчэ i грузавыя лiфты, а таксама асобныя элементы кшталту пандусаў. У вакзал можна будзе зайсцi з любога боку, дзвярэй хапае. У вонкавым аздабленнi выкарыстоўваюцца па плану такiя ж матэрыялы, як i пры стварэннi новага будынка чыгуначнага вакзала — шкло, крыху металу, натуральны камень. Праекты двух вакзалаў адрознiваюцца памiж сабой, але мiж тым захавалi адзiную агульную рысу — абодва ўяўляюць узор сучаснай архiтэктуры:

— Пры стварэннi аблiчча «Цэнтральнага» мы не арыентавалiся на модныя, папулярныя зараз тэндэнцыi i павевы. Мы iмкнёмся самi ствараць моду, увайсцi ў тыя адзiнкi, за якiмi будуць паўтараць астатнiя. Таму будынак новага вакзала сам будзе дыктаваць iншым, як трэба ствараць архiтэктурныя праекты, — не без гонару расказаў мне архiтэктар Iван Вiнаградаў, кiраўнiк аўтарскага калектыву «Творчай майстэрнi архiтэктара I.К. Вiнаградава» (гэтая арганiзацыя распрацоўвала праект комплексу). — Пра гэта мала хто ведае, але адначасова мы вырашалi i складаную задачу — вакзал трэба было спраектаваць так, каб яго фундамент i сеткi тэхнiчнага забеспячэння будынка, якiя праходзяць пад зямлёй, не перашкаджалi будаўнiцтву новых лiнiй метро, што плануюць у будучым праводзiць праз вулiцу Бабруйскую.

I самае галоўнае, у новым «Цэнтральным» будуць створаны ўсе ўмовы для пасажыраў — вялiкая камфартабельная зала чакання з утульнымi крэсламi, якая будзе пафарбавана нават двума колерамi, пакой мацi i дзiцяцi, камеры захоўвання рэчаў, лiфты i санвузлы для асоб з абмежаванымi магчымасцямi, усе памяшканнi будуць вялiкiмi, светлымi i прасторнымi. Як падагульнiў Iван Вiнаградаў, «будзе зменена ўсё ў бок самага лепшага».

Дарэчы, у час будаўнiцтва аўтобусныя маршруты, якiя раней адыходзiлi ад «Цэнтральнага», будуць адпраўляцца з iншых сталiчных аўтавакзалаў. Частка вулiцы Бабруйскай, магчыма, пасля пачатку работ будзе перакрыта. Ёсць меркаваннi, што пасля ўзвядзення новага «Цэнтральнага» вакзал пачне абслугоўваць толькi мiжнародныя рэйсы.