Прэзiдэнт зацвердзiў рашэнне на ахову Дзяржаўнай гранiцы Беларусi ў 2007 годзе

Источник материала:

Цяпер Беларусь ахоўвае 2 тыс. 331,6 км гранiцы Саюзнай дзяржавы. Не ахоўваецца толькi ўчастак беларуска-расiйскай гранiцы (каля 1 тыс. 283 км). Дзейнiчае 57 пунктаў пропуску, у тым лiку 42 — мiжнародныя. У 2006 годзе гэту гранiцу перасеклi 24,2 млн чалавек i больш як 8,2 млн транспартных сродкаў. I з кожным годам патокi ўзрастаюць.

Як заявiў Прэзiдэнт, Беларусь i ў далейшым не плануе арганiзоўваць ахову ўчастка гранiцы з Расiйскай Федэрацыяй. «Нягледзячы на тую пазiцыю, якую заняло сёння расiйскае кiраўнiцтва, мы нiякiх мерапрыемстваў па пагранiчных войсках на беларуска-расiйскай гранiцы не ўводзiм. Мы ахоўваць яе не будзем», — сказаў кiраўнiк дзяржавы.

Разам з тым, сёння на беларуска-расiйскай гранiцы з боку Расii дзейнiчае 16 пунктаў мытнага афармлення. Паводле слоў старшынi Дзяржаўнага камiтэта пагранвойскаў Аляксандра Паўлоўскага, «фактычна гэта 16 мытняў, якiя працуюць у асноўным у рэжыме кантролю тавараў з трэцiх краiн». «Калi шчыра, Расii застаўся адзiн крок да стварэння мытнай гранiцы», — паведамiў ён. Як праiнфармаваў Аляксандр Паўлоўскi, Расiйская Федэрацыя паблiзу гранiцы з Беларуссю размясцiла каля 150 аператыўных работнiкаў, якiя дзейнiчаюць у iнтарэсах расiйскiх пагранвойскаў.

Такiм чынам, расiйскi бок ужо зрабiў першы крок у напрамку аднаўлення гранiцы з Беларуссю. У той жа час Расiя пакуль яшчэ не ўвяла пагранiчную зону на гранiцы з Беларуссю, як зрабiла гэта на гранiцы з Украiнай, Латвiяй i Эстонiяй.

Беларускiя пагранiчнiкi за мiнулыя гады правялi значную работу ў iнтарэсах Расii. Паводле даных старшынi Дзяржкампагранвойскаў, за апошнiя тры гады гранiцу нашай краiны перасеклi больш як 27 тыс. грамадзян чэчэнскай нацыянальнасцi. З iх лiку затрыманы двое — гэта тэрарысты, якiя знаходзiлiся ў расiйскiм вышуку. Iх перадалi Расiйскай Федэрацыi.

Пры гэтым Беларусь фiнансуе дзве трэцi затрат на ахову гранiцы Саюзнай дзяржавы. Фiнансаванне аховы гранiцы iдзе ў рамках адпаведнай саюзнай праграмы. Уклад Беларусi складае прыкладна дзве трэцi ад усёй праграмы. Акрамя таго, наша краiна выдзяляе сродкi з уласнага бюджэту.

Беларусь прадоўжыць рэалiзацыю пагранiчнай палiтыкi ў рамках Саюзнай дзяржавы з прыцягненнем мiжнародных фiнансавых праграм для мэтанакiраванага забеспячэння ўпарадкавання дзяржаўнай гранiцы.

Цяпер падрыхтавана новая пяцiгадовая праграма Саюзнай дзяржавы, у рамках якой будуць вырашаны пытаннi завяршэння стварэння падраздзяленняў гранiцы на прыбалтыйскiм участку, пытаннi абнаўлення польскага ўчастка гранiцы — некаторым заставам ужо больш як 50 гадоў.

Беларусь стварыла надзейную ахову знешняй гранiцы Саюзнай дзяржавы з Еўрасаюзам, а гэта каля 1 тыс. 250 км. Тут, у адрозненне ад Расiйскай Федэрацыi, беларускi бок мае поўнасцю дэмаркiраваную гранiцу, на асноўных напрамках створана iнфраструктура i шырокая сетка пунктаў пропуску.

Беларусь самастойна на працягу апошнiх трох гадоў фактычна аднавiла гранiцу з Польшчай (былую савецкую гранiцу) працягласцю каля 400 км.

Акрамя таго, у рамках барацьбы з нелегальнай мiграцыяй Беларусь да гэтага часу за свае сродкi ўтрымлiвае ўсе iнжынерна-тэхнiчныя збудаваннi, якiя знаходзяцца на нашай гранiцы яшчэ з савецкiх часоў.

На прыбалтыйскiм участку гранiцы створана сiстэма аховы гранiцы на найбольш адказных участках.

Як далажыў старшыня Дзяржаўнага камiтэта пагранвойскаў, у краiне плануецца завяршыць стварэнне i ўкараненне аўтаматызаванай сiстэмы аховы дзяржаўнай гранiцы, пагранiчнага кантролю, аператыўна-вышуковай дзейнасцi. У гэтым годзе будзе ўкаранёны аператыўна-мабiльны спосаб аховы гранiцы на прыбалтыйскiм i ўкраiнскiм участках. Будзе распрацавана таксама канцэпцыя развiцця пагранiчных войскаў на 2008—2018 гады.

Намаганнi ведамства будуць накiраваны на выкананне патрабаванняў Прэзiдэнта па забеспячэнню аховы дзяржгранiцы ва ўмовах рэальна iснуючых рызык, небяспек i пагроз. Дзяржкамiтэт пагранвойскаў мае намер узаемадзейнiчаць з усiмi грамадзянскiмi органамi ўлады па правядзенню комплексных узгодненых дзеянняў, якiя даюць магчымасць забяспечыць нацыянальную бяспеку.

Кар. БЕЛТА.