Колькi павiнны каштаваць дровы?

25.08.2009 22:17 — |

Размер текста:: A; A; A

Источник материала:

Усе мы чулi, як па радыё выступаў наш Прэзiдэнт, якi сказаў, што патрэбна ачысцiць лясы ад буралому. Няхай людзi бяруць яго на дровы за ўмераную плату. У Вiцебскай вобласцi яны каштуюць 3—4 тысячы рублёў за кубаметр (як пiсала ваша газета ў 2006 годзе). У Негарэльскiм ляснiцтве — таксама нядорага. Затое ў Путчынскiм ляснiцтве за дровы, якiя ляжаць на зямлi ўжо гады тры-чатыры, бяруць за вольху, елку 8,5 тысячы рублёў, за бярозу — 9 тысяч рублёў за кубаметр. Жывём мы ў адной дзяржаве, а цэны такiя розныя. Просiм дапамагчы разабрацца.

Жыхары Путчынскага сельскага Савета, Дзяржынскi раён.

Як патлумачылi нам у Мiнскай дзяржаўнай лесагаспадарчай установе (ДЛГУ), якой падпарадкоўваецца i Путчынскае ляснiцтва ў тым лiку, з гэтага года кошт на лесаматэрыялы хвойных i лiсцевых парод i палiўныя дровы адзiны для ўсiх спажыўцоў. Але ў кожнай вобласцi ён зацвярджаецца аблвыканкамамi, зыходзячы, з канкрэтных умоў, таму параўноўваць цэны на дровы ў Мiнскай i Вiцебскай абласцях (тым больш за мiнулы год) не зусiм карэктна. Тым больш што з 9 студзеня Мiнскiм аблвыканкамам зацверджаны новыя рознiчныя цэны для насельнiцтва на палiўныя дровы (у параўнаннi з папярэднiм яны павялiчылiся недзе на 16 працэнтаў). У прыватнасцi, цяпер на тэрыторыi вобласцi адзiн кубаметр бярозы i вольхi каштуе 11 200 рублёў, а елкi i асiны — 10 600 рублёў. Прычым не мае значэння, гаворка iдзе пра круглы лес цi палiўныя дровы. З тралёўкай гэта цана павялiчваецца да 12—15 тысяч рублёў за кубаметр у залежнасцi ад пароды драўнiны. З загрузкай i дастаўкай грамадзянiну прама на падворак яна павялiчваецца да 27 тысяч рублёў (дровы змешаных парод) за кубаметр. Саманарыхтоўка дроў насельнiцтвам забаронена, адзiнае, калi чалавек мае ўласны транспарт, ён можа сам вывезцi ўжо нарыхтаваныя дровы. Каштаваць гэта будзе, як мы ўжо сказалi вышэй, ад 10 600 да 11 200 рублёў за кубаметр у залежнасцi ад пароды.