«ЕўраФэст» на фiнiшы

Источник материала:

Акрамя трох канкурэнтаў — Дзiяны Гурцкая, Дзмiтрыя Калдуна i гурта «Thе Рrоjесt», — перад публiкай выступяць замежныя госцi: уладальнiк другога месца на «Еўрабачаннi-2006» расiйскi спявак Дзiма Бiлан, пераможца «Еўрабачання-2002» спявачка Мары Эн, гурт «Космас» з Латвii, шведская зорка Карола, а таксама беларускiя ўдзельнiкi «Еўрабачання» — прычым, як дарослага, так i дзiцячага. Дуэт «Аляксандра i Канстанцiн», Анжэлiка Агурбаш, Палiна Смолава, Вольга Сацюк, Ксенiя Сiтнiк, Андрэй Кунец парадуюць як тых гледачоў, што прыбудуць у сталiчны Палац спорту, так i тых, хто вырашыць паглядзець шоу па тэлевiзары — прамая трансляцыя канцэрта пачнецца ў 19.20.

Сапраўдным сюрпрызам i каталiзатарам для i без таго напружанай барацьбы стане прыбыццё на беларускi суперфiнал спецыяльных гасцей. Як расказаў «Звяздзе» выканаўчы прадзюсар праекта «ЕўраФэст» Дзмiтрый Баранаў, сваё з’яўленне пацвердзiлi Фiлiп Кiркораў i Кiм Брэйтбург, якiя прылятаюць з Масквы, каб падтрымаць «сваiх» канкурсантаў (Фiлiп Бядросавiч напiсаў песню Дзiму Калдуну, Кiм Брэйтбург — аўтар песнi Дзiяны Гурцкая). Ёсць таксама папярэднiя дамоўленасцi (але яны канчаткова не пацверджаныя) з прадзюсарамi Яўгенам Фрыдляндам i Вiктарам Дробышам. Карацей, што-што, а сумна не будзе. А як усё ж будзе i чаго чакаць на сцэне, мы паспрабавалi высветлiць у самiх суперфiналiстаў.

ПРА МАГIЮ, БЕЛЫЯ КРЫЛЫ I ЭЛЕМЕНТЫ «КУПАЛIНКI»

Як нi дзiўна, але чым блiжэй да «дня Iкс», тым, здаецца, больш спакойнымi i пазiтыўнымi робяцца канкурсанты. Магчыма, у iх проста не хапае часу на высвятленне адносiнаў, — трэба ж зрабiць уласнае выступленне бездакорным.

Дарэчы, нiчога мяняць у песнi i сцэнiчнай пастаноўцы нумара не збiраецца толькi Дзiяна Гурцкая, чыя кампазiцыя «Hоw lоng» уяўляла сабой цэласны нумар ужо ў фiнале. Ва ўсякiм выпадку, брат i афiцыйны прадстаўнiк спявачкi Роберт Гурцкая лiчыць, што дапрацоўваць выступленне не трэба — узровень i iмя гавораць самi за сябе. У прынцыпе, гэткага меркавання прытрымлiвалася i журы, бо Дзiяне нiякiх рэкамендацый па «змяненню i паляпшэнню» не давалася. Такiм чынам, 22 студзеня мы ўбачым у выкананнi Дзiяны i яе каманды ўсё той жа нумар — пранiкнёная баладная кампазiцыя, падтанцоўка ў белым i пастаноўка з анёльскiмi крыламi.

Дзiме Калдуну не трэба было паўтараць двойчы, што калi хочаш спаборнiчаць з iншымi на роўных, трэба змянiць конкурсную песню — спявак i сам гэта цудоўна разумеў. У даволi сцiслыя тэрмiны Дзмiтрый, якога пасля выхаду ў суперфiнал адбору падтрымаў не толькi ўласны прадзюсар Вiктар Дробыш, але i знаёмы яшчэ па «Фабрыцы зорак-6» Фiлiп Кiркораў, злятаў у Грэцыю, дзе запiсаў новую песню — англамоўную «Wоrk Yоur Mаgiс». Аўтары кампазiцыi — Карэн Кавалеран (словы) i... Фiлiп Кiркораў (музыка)! Дарэчы, прысутнасць экс-удзельнiка «Еўрабачання-1995» адчуваецца сёлета лiтаральна ва ўсiм — так, Фiлiп «падарыў» Дзiме Калдуну не толькi песню, але i трох бэк-вакалiстаў, якiя падтрымаюць канкурсанта на сцэне. Акрамя таго, як расказаў нам сам Дзiма, у пастаноўцы задзейнiчаны два танцоры — балет Сяргея Епiхава.

— Гэта Палiна Смолава табе ў спадчыну пакiнула? — пацiкавiлiся мы.

— Не, чаму ж. Проста мы сябруем, таму Сяргей адразу адгукнуўся, калi спатрэбiлася прадумаць пастаноўку.

Дарэчы, i песня (перакласцi яе назву можна як «Рабi чараўнiцтва»), i сцэнiчная пастаноўка будуць абыгрываць «магiчнае» прозвiшча выканаўцы. Паводле iдэi Дзiмы, падтрыманай сцэнографамi, чароўны антураж увасобiцца ў чатырох шыльдачках са знакамi задыяка — «Кiркорава, Дробыша, мой i... яшчэ аднаго чалавека», як неахвотна патлумачыў спявак. З шыльдачак павiнна лiцца святло. Зрэшты, як яно будзе на самай справе, убачым падчас канцэрта — пакуль можна сказаць толькi, што i Калдуну, i Дробышу падабаецца тое, што атрымлiваецца, а гэта, бадай, галоўнае для ўпэўненасцi ў сваiх сiлах.

На канкурэнтаў Дзмiтрый Калдун па традыцыi... не звяртае ўвагi, а перад сабой напалеонаўскiх планаў не ставiць:

— Мая задача — не абмяркоўваць кагосьцi, а проста рабiць сваю справу. Праграма-мiнiмум, натуральна — перамагчы ў адборы, ну а праграма-максiмум — трапiць у фiнал «Еўрабачання» i заняць там месца ў дзесятцы. Каб наступнаму ўдзельнiку ад Беларусi не давялося пачынаць усё з нуля.

Журы параiла дапрацаваць песню i «Thе Рrоjесt», звярнуўшы асаблiвую ўвагу на тое, што да iнтэрнацыянальнага жарту няблага было б дадаць «элемент фальклору». Адзiн з салiстаў дуэта, а таксама лiдар гурта «Харлi» Жэня Чалышаў хоць i лiчыць, што мода на этнiку паступова сыходзiць, спрачацца ўсё ж не стаў — i цяпер у песнi ёсць фолкавы фрагмент незразумелага паходжання. Акрамя таго, змянiлася аранжыроўка кампазiцыi — самыя пiльныя без асаблiвых цяжкасцяў пачуюць памiж радкоў «Купалiнку», а самыя ўражлiвыя... ну хто ж ведае, што яны пачуюць.

— Напэўна, мы крыху памяняем i сцэнiчную пастаноўку, каб яна адпавядала музыцы, — расказаў Жэня. — Так, балалайка застанецца. На жаль, не будзе мядзведзя i цыганаў... Але ў цэлым канцэпцыя не памяняецца. Будуць забаўныя дэталi, i разам з тым мы пастараемся не скацiцца ў клаунаду, не зайграцца. Да канкурэнтаў Чалышаў ставiцца з павагай: «Усе вартыя перамогi. Калi была б магчымасць — адправiў бы на «Еўрабачанне» ўсiх! Але я, шчыра кажучы, нiкога не баюся, i лiчу, што мы не менш за астатнiх прэтэндуем на тое, каб перамагчы». Мiж iншым, нават пры самым горшым раскладзе — нявыхадзе «Thе Рrоjесt» у суперфiнал — iхняя песня-пародыя «S.U.Р.Е.R. S.T.А.R.» не згубiцца: самае позняе, восенню выйдзе паўнавартасны альбом гурта. А яшчэ раней — лiтаральна ў лютым — прэзентуе свой другi альбом гурт «Харлi»

ВАША СЛОВА, ТАВАРЫШ ЖУРЫ

Нягледзячы на шматлiкiя чуткi, быццам бы ў суперфiнале «закiнуць слоўца» за сваiх улюбёнцаў змогуць гледачы, расчаруем шаноўную публiку: выбар асноўнага выканаўцы, якi прадставiць Беларусь на «Еўрабачаннi-2007» у Фiнляндыi, залежыць ЦАЛКАМ ад журы. Яно, як i на папярэднiм туры адбору, будзе засядаць у тэлестудыi i ацэньваць выступленнi канкурсантаў з экрана. Лёс шчаслiўчыка, нагадаем, вызначаюць 9 чалавек: старшыня прафесiйнага журы, кiраўнiк Нацыянальнага канцэртнага аркестра Беларусi Мiхаiл Фiнберг, першы намеснiк мiнiстра культуры Уладзiмiр Рылатка, мастацкi кiраўнiк праекта «Еўрабачанне-2007» Васiль Раiнчык, дырэктар дырэкцыi музычных i забаўляльных праграм Белтэлерадыёкампанii Дзянiс Шпiтальнiкаў, мастацкi кiраўнiк ансамбля «Сябры» Анатоль Ярмоленка, кампазiтар Леанiд Захлеўны i iншыя прафесiяналы.