Назва-брэнд у завода ранейшая, а прадукцыя — сучасная

Источник материала:

«Гарачы» тэлефон «Звязды» 287-17-41

— ...што гэта за воск i пры чым тут горы? — закончыў за нас пытанне заяўнiкаў, што паступiла на рэдакцыйную лiнiю, дырэктар ААТ «Завод горнага воску» канцэрна «Белнафтахiм» Валерый Мулярчык. — Гор у нас у Беларусi сапраўды няма — сведчу як майстар спорту па альпiнiзму. А прадпрыемства наша было заснавана ў 1961 годзе для здабычы сырога тарфянога воску па iнiцыятыве тагачаснага Iнстытута торфу Акадэмii навук Беларусi.

Як расказаў далей Валерый Уладзiмiравiч, гэтая сыравiна выкарыстоўвалася для вытворчасцi мадэльных саставаў, што прызначалiся для дакладнага лiцця. Як вядома, далёка не кожную дэталь можна вырабiць на такарным, фрэзерным або шлiфавальным станку, напрыклад, складанай канфiгурацыi. Такiя дэталi патрэбны для авiяцыйнай прамысловасцi, маторабудаўнiчай i iнш. Менавiта сыры тарфяны воск — як адзiн з кампанентаў — дазваляў лiць формы, што забяспечвалi вырабленым дэталям патрэбныя характарыстыкi.

— Аднак з 1994 года з-за шэрагу аб’ектыўных i суб’ектыўных прычын выпуск сырога горнага воску завод спынiў. Ды i ў свеце яго зараз не выкарыстоўваюць, хоць назва прадпрыемства — як брэнд — захавалася, як бачыце. Цяпер завод выпускае iншую сыравiну, — паведамiў Валерый Мулярчык.

Сёння на прадпрыемстве працуе 240 чалавек. Паводле слоў дырэктара, на працягу 2006—2010 гадоў завод чакае шырокамаштабная рэканструкцыя, а фактычна — узвядзенне новага прадпрыемства.