Семежава плануе рэкорды...

Источник материала:

— А яшчэ пяць—сем гадоў таму сiтуацыя ў Семежаве была, шчыра кажучы, дрэннай, таму што каровы хварэлi на лейкоз i сухоты. Асаблiвую трывогу выклiкаў участак нумар тры малочнатаварнай фермы, — узгадвае галоўны ветэрынарны ўрач Капыльскага раёна Леанiд Паляшчук. — А зараз пра тое, што ў жывёлы былi хваробы, ужо i не памятаюць — дзякуючы вялiкай працы праблема знiкла. Той жа трэцi ўчастак у СВК «Семежава» ў 2006 годзе паставiў рэкорд — 6232 кiлаграмы малака ў сярэднiм ад каровы.

У планах гаспадаркi — выйсцi на абсалютныя сто працэнтаў вытворчасцi малака вышэйшага гатунку. Таму сёлета «Семежава» працягне сваё развiццё. Напрыклад, новы комплекс, якi разлiчаны на 720 галоў, пачне працаваць у гэтым годзе. Дзяржавай былi выдаткаваны сродкi на набыццё неабходнага абсталявання i матэрыялаў, аднак усе работы праводзiліся толькi ўласнымi сiламi — гаспадарчым спосабам, брыгады будаўнiкоў «збоку» не наймалiся. Гэта дазволiла эканомiць сродкi. Увогуле, грошы тут лiчыць навучылiся — яшчэ летась перарабiлi сiстэму ацяплення гаспадаркi на той выпадак, каб цалкам перайсцi на мясцовыя вiды палiва.

Як лiчаць работнiкi фермы, гаспадарчыя поспехi залежаць i ад таго, як арганiзавана праца. У «Семежаве» яшчэ некалькi гадоў таму змянiлi рацыён жывёлы, што адразу ж адбiлася i на якасцi малака. Як толькi пачалi ўводзiць новыя падкормкi, дабаўкi, адразу павысiлiся надоi.

— Паказчыкi паляпшаем за кошт маладняку ў статку, акрамя таго, мы пачалi актыўна ўжываць даiльныя апараты тыпу «Ялiнка». Па-новаму арганiзаваны ў вытворчым кааператыве i працэс кармлення. Зараз жывёла мае свабодны доступ да кармоў, мы яе не трымаем на прывязi, — падкрэслiвае загадчык фермы Уладзiмiр Рубецкi. — Новае, цалкам механiзаванае халадзiльнае абсталяванне закрытага тыпу, якое мы ўсталявалi за два гады, дазваляе рэгуляваць тэмпературу сыравiны, захоўваць яе ў належным стане.

У апошнi раз прамысловы халадзiльнiк для захоўвання толькi што атрыманага малака набылi ў сярэдзiне 1980-х. Вялiкi нямецкi апарат працаваў добра, аднак з цягам часу пачаў рабiць усё наадварот — замест таго, каб астуджаць сыравiну, ён у аўтаматычным рэжыме адключаўся, i малако псавалася. Давялося яго замянiць.

Змены ў СВК «Семежава» прыметныя не толькi ў вытворчай сферы. З развiццём аграгарадка ў хатах жыхароў з’явiўся газ, асартымент у мясцовай краме зараз у стане задаволiць усе спажывецкiя густы. У мясцовым музеі вёскi адчынiўся i раённы музей народнага ткацтва. Амаль усе экспанаты падарылi жыхары Семежава i краязнаўчы музей. Музей з’яўляецца не проста памяшканнем, дзе захоўваюцца ўзоры, вырабленыя народным майстрам: тут працуюць разнастайныя гурткi для дзяцей, а яшчэ ёсць майстэрня, дзе па ўсiх старажытных законах мастацкай творчасцi ствараюць сапраўдныя беларускiя габелены i ткуць тканiну. Мэта музея — адрадзiць былыя традыцыi Капыльшчыны.