«Дозай» — па пячонцы

Источник материала:

Нядаўна супрацоўнiкi аддзела па барацьбе з эканамiчнымi злачынствамi Ашмянскага РАУС i УБЭЗ УУС Гродзенскага аблвыканкама выявiлi дзве кропкi распаўсюджання сурагатнага алкаголю. Паводле даных упраўлення iнфармацыi i грамадскiх сувязяў МУС, было ўстаноўлена, што мясцовы жыхар наладзiў нелегальную пастаўку з Расii рознай спiртазмяшчальнай вадкасцi накшталт «Максiмкi», «Раствору душыстых рэчываў парфумерна-касметычнага дэнатурыраванага», «Растваральнiка бытавога», «Экстрасента-1» i праз пасярэднiцу рэалiзоўваў на тэрыторыi раёна. Мiж iншым, кошт разведзенай «дозы» ў паўлiтровай бутэльцы «заважваў» 3 тысячы рублёў, а за лiтар арыгiнальнага «пойла» «бiзнэсмены» бралi ад 2,5 да 3 долараў ЗША. Усяго iм удалося рэалiзаваць 7 тон сурагатнага напою на суму больш за 25 мiльёнаў рублёў. За незаконную прадпрымальнiцкую дзейнасць гэтыя грамадзяне былi асуджаны ў аўторак да 3,5 года пазбаўлення волi кожны. Як заўважаюць у мiнiстэрстве, алкагольная прадукцыя, што рэалiзоўваецца ў падпольных умовах, у большасцi выпадкаў выраблена з нехарчовай спiртазмяшчальнай вадкасцi з высокiм утрыманнем шкодных для арганiзма чалавека дэнатурыруючых рэчываў. У прыватнасцi, дыэтылталата, якi правакуе развiццё таксiчнага гепатыту i разбурэнне пячонкi, а часам прыводзiць i да лятальнага канца. Дарэчы, праваахоўнiкамi толькi за студзень было канфiскавана 213 тысяч лiтраў спiрту i iншых сурагатных вырабаў на суму звыш 620 мiльёнаў рублёў, а таксама было выяўлена 3 падпольныя цэхi па вытворчасцi фальсiфiкаванага алкаголю. Як зазначаюць у МУС, за ўдзел у нелегальным абароце спiртазмяшчальных вадкасцяў, а таксама за вытворчасць i рэалiзацыю фальсiфiкаваных спiртных напояў прадугледжана адмiнiстрацыйная адказнасць — штрафы да 5000 базавых велiчынь, i крымiнальная — да 5 гадоў пазбаўлення волi.