«Бi-2» з малаком

Источник материала:

Запрашальнiк

Альбом «Малако» — чарговае здзiўленне для прыхiльнiкаў гурта. I нават не адно, а тры: новая музыка, новы iмiдж i новы спосаб падтрымкi дыска — не канцэртамi па вялiкiх i малых расiйскiх гарадах, а вялiкiм замежным турнэ (ЗША, Германiя, Францыя, Прыбалтыка). Цяпер вось «малочныя рэкi» дацяклi i да Беларусi, прычым некаторыя хiты з альбома мы ўжо добра ведаем: песня «Дурнiчка», нечакана танцавальная i энергiчная, трывала прапiсалася ў тэлевiзiйных i радыёэфiрах, а «Трымацца за паветра» i «Сны» працягнулi лепшыя традыцыi славутай лiрыкi «Бi-2». Дзеля таго, каб гэта пачуць, варта было набрацца цярпення i пачакаць два з паловай гады — менавiта тады выйшаў папярэднi альбом гурта «Iншамаркi», а сам калектыў паспеў радыкальна абнавiць састаў.

Дарэчы, назву пласцiнкi Лёва i Шура Бi-2 звязваюць з антыутопiяй Энтанi Бёрджэса «Завадны апельсiн», а таксама аднайменнай экранiзацыяй рамана, якую зняў Стэнлi Кубрык. У афармленнi альбома музыканты нават па-свойму абыгралi «завадную» тэму. Да поўнай камплектацыi сапраўдным прыхiльнiкам не хапае хiба што аўтографаў на вокладцы. Што ж, такi шанц будзе — у дзень канцэрта ў Мiнску, 14 лютага, акрамя выступленн ў КЗ «Мiнск», запланавана правесцi ў адным з музычных магазiнаў сталiцы аўтограф-сесiю i наладзiць жывое кантактаванне з артыстамi. Акрамя таго, Лёва i Шура напояць «Малаком» Гомель (11 лютага), Брэст (12 лютага) i — хто б сумняваўся — родны Бабруйск (13 лютага). Прычым разам з «Бi-2» у кожным горадзе на сцэну выйдзе гурт «Лакмус» — у якасцi спецыяльных гасцей i паўнапраўных удзельнiкаў канцэртаў.

Спявайма песнi пра каханне...

Гэта амаль што правiла: напярэдаднi ўсякiх вялiкiх святаў наладжваць вялiкiя канцэрты. I людзям прыемна, i артыстам заробак. I дзень Святога Валянцiна — не выключэнне. У адным толькi Мiнску да яго прымеркавана мноства тэатральных, музычных i ўсякiх iншых прадстаўленняў. Але аўтарскi праект спявачкi Iскуi Абалян «Гэта проста каханне» — выключэнне, якое, вiдаць, не згубiцца на агульным фоне.

Па-першае, гэта не проста канцэрт, як падкрэслiў яго прадзюсар i муж спявачкi Андрэй Калiна — а менавiта праект, якi пры ўдалым раскладзе атрымае працяг. Пад адным «дахам» — тэмай — аб’яднаны самыя розныя, як прынята казаць, топавыя артысты: сама Iскуi, а таксама Аляксандр Цiхановiч i Ядвiга Паплаўская, Iна Афанасьева, Палiна Смолава, Аляксей Хлястоў, Алеся, Вiктар Пшанiчны, Алена Грышанава, Пётр Елфiмаў, Вольга Плотнiкава, Аня Шаркунова, арт-група «Беларусы», гурты «Тяни-Толкай» і «NЕО». Па-другое, сам канцэрт пройдзе ў Палацы Рэспублiкi не ў дзень усiх закаханых, а напярэдаднi, 13 лютага. А вось тэлеверсiя з’явiцца на канале СТБ якраз 14-га. Прычым у адрозненне ад усiх астатнiх беларускiх «тэлеканцэртаў», на гэты не раздаюцца запрашальнiкi, а прадаюцца бiлеты. А яшчэ сюды не запрошаны расiйскiя зоркi — бо, паводле слоў прадзюсара СТБ Паўла Каранеўскага, «наша беларуская эстрада ўжо не горшая, яна самадастатковая».

А яшчэ на канцэрце будзе поўны мех сюрпрызаў. Пачаць хоць бы з таго, што кожны ўдзельнiк, акрамя песнi пра каханне, прызнаецца ў гэтым самым каханнi проста са сцэны. Аўтар праекта Iскуi Абалян асабiста для кожнага падбiрае прыгожыя ўрыўкi з твораў класiчнай i сучаснай паэзii. Музычныя ж прызнаннi кожны артыст аформiць па-свойму. Вольга Плотнiкава, напрыклад, прысвяцiла песню... будучай дачушцы. Аляксей Хлястоў прадставiць прэм’еру песнi «Па секундах i мiнутах», якая трапiць на радыё i ТБ толькi вясной. Дзве прэм’еры — «Iду да цябе» i «Падаю крыламi ўнiз» — выканае i гаспадыня вечара. А яшчэ канцэрт падорыць гледачам дзiвосны дуэт — дачка Iскуi Ксюша Калiна праспявае разам з Анатолем Ярмоленкам (малодшым, у сэнсе, унукам) супершлягер «Мiльён пунсовых руж». Якiм атрымаецца ў дзяцей выкананне дарослага рэпертуару? Хочацца спадзявацца, што шчырым i прыгожым. Як i ўвесь зборны канцэрт «пра каханне».