Нi адна з сацыяльных праграм скарачацца не будзе

Источник материала:

Напярэдаднi першай сесii абласнога Савета новага склiкання Мiкалай Дамашкевiч падвёў вынiкi дзейнасцi Савета мiнулага, 24-га склiкання i акрэслiў напрамкi для далейшай работы.

— Дэпутацкi корпус стаў маладзейшым i па складу значна змянiўся. Таму магчымасць праявiць сябе ёсць у кожнага народнага выбраннiка, — падкрэслiў ён.

Работу Савета 24-га склiкання ў аблвыканкаме ацэньваюць як добрую, i аб гэтым сведчаць вынiкi першага года пяцiгодкi: усе прагнозныя паказчыкi выкананы.

— У сувязi з новым коштам на палiва высветлiлася, што для выканання ўсiх задач па далейшаму развiццю Мiншчыны неабходна яшчэ 110 мiльярдаў рублёў, — паведамiў Мiкалай Дамашкевiч. — Крынiцы рэсурсаў ёсць, напрыклад, за кошт скарачэння тэрмiнаў узвядзення аб’ектаў, выкарыстання новых тэхналогiй i iнш. Толькi ў будаўнiчай сферы можна дадаткова атрымаць 20 мiльярдаў, а ў сельскай гаспадарцы, у прыватнасцi, у мясной i малочнай яго галiне ажно 80 мiльярдаў.

Дэпутатам 24-га склiкання, якiя вылучалiся сваёй дзейнасцю на карысць чалавека, старшыня Мiнскага аблвыканкама ўручыў ганаровыя граматы, падзякi i грашовыя прэмii. Мiкалай Дамашкевiч, у адказ на пытанне карэспандэнта «Звязды» расказаў, што паўнамоцтваў для вырашэння пэўных праблем, якiя турбуюць людзей, у дэпутатаў хопiць.

— На сто працэнтаў, i гэта зусiм не хвальба, дэпутат у стане вырашыць праблему чалавека, якi з ёю звярнуўся. Гэтага ад яго патрабуе не толькi закон. Ёсць яшчэ i сумленне, якiм кiруецца дэпутат у час работы. Таму ўсе звароты да народных выбраннiкаў задавальняюцца i пытаннi павiнны вырашацца. Канешне, пры ўмове, што яны мэтанакiраваныя, i чалавеку сапраўды патрабуецца падтрымка ў вырашэннi таго цi iншага пытання, — паведамiў Мiкалай Дамашкевiч.