Без згоды суседа аформiць участак будзе праблематычна. Але магчыма

Источник материала:

I. АЎТУШКА, г. Смалявiчы.

— Справа ў тым, што зямельныя ўчасткi прадастаўляюцца ва ўласнасць цi пажыццёвае валоданне для будаўнiцтва i абслугоўвання жылога дома, — адказваюць спецыялiсты Дзяржаўнага камiтэта па маёмасцi Рэспублiкi Беларусь. — А вось перадача зямельнага ўчастка для абслугоўвання кватэры ў блакiраваным жылым доме цi часткi жылога дома заканадаўствам не прадугледжана.

Для афармлення зямельнага ўчастка на агульным долевым праве для абслугоўвання адной капiтальнай двухкватэрнай пабудовы яго ўласнiкам неабходна звярнуцца ў адпаведны выканаўчы i распарадчы орган з заявай. У заяве павiнны быць указаны вiды права на зямельны ўчастак, а таксама долi зацiкаўленых асобаў у гэтым праве. Разам з тым ёсць выпадкi, калi адзiн цi некалькi ўдзельнiкаў агульнай долевай уласнасцi на капiтальную пабудову невядомыя, не зацiкаўлены або ўхiляюцца ад падачы заяў аб атрыманнi зямельнага ўчастка.

З гэтага становiшча можа быць iншае выйсце. Калi капiтальная пабудова зарэгiстравана ў вызначаным парадку, то I. Аўтушка неабходна заключыць з удзельнiкам агульнай долевай уласнасцi дагавор аб падзеле капiтальнай пабудовы, на падставе якога зарэгiстраваць у тэрытарыяльнай арганiзацыi па дзяржаўнай рэгiстрацыi нерухомай маёмасцi, правоў на яе i здзелак з ёю (у вашым выпадку Смалявiцкiм бюро Барысаўскага фiлiяла РУП «Мiнскае абласное агенцтва па дзяржаўнай рэгiстрацыi i зямельнаму кадастру) стварэнне капiтальнай пабудовы i ўзнiкненне права ўласнасцi на асобную капiтальную пабудову (дом), пасля чаго аформiць адпаведны сфармiраваны ў вынiку падзелу зямельны ўчастак ва ўласнасць цi пажыццёвае валоданне з правам перадачы ў спадчыну.

У выпадку недасягнення згоды з удзельнiкамi агульнай долевай уласнасцi пры заключэннi дагавора аб падзеле дома гэтая спрэчка можа разглядацца ў судзе. Падставай для дзяржаўнай рэгiстрацыi стварэння капiтальнай пабудовы i ўзнiкнення права ўласнасцi на яе ў гэтым выпадку будзе рашэнне суда.