Адбыць пакаранне за мяжой

Источник материала:

Мой сын асуджаны судом да выплаты ў даход дзяржавы 20 працэнтаў заробку. Працу па месцы жыхарства знайсцi складана. Падкажыце, цi можна яму выехаць на заробкi ў Расiю i як у такiм выпадку рабiць 20-працэнтныя адлiчэннi?

Вiктар, Брэсцкая вобласць.

Парадак i ўмовы адбывання пакарання павiнны тлумачыць крымiнальна-выканаўчыя iнспекцыi па месцы ўлiку асуджанага. Акрамя таго, згодна з артыкулам 37 Крымiнальна-выканаўчага кодэкса Рэспублiкi Беларусь, гэтыя iнспекцыi кантралююць захаванне ўмоў адбывання пакарання асуджанымi i выкананне прадпiсанняў прыгавору адмiнiстрацыяй прадпрыемстваў, у якiх працуюць асуджаныя, кантралююць правiльнасць i своечасовасць утрыманняў з заработнай платы асуджаных i пералiчэнне ўтрыманых сум у адпаведны бюджэт, пры неабходнасцi накiроўваюць асуджаных у органы дзяржаўнай службы занятасцi для працаўладкавання, кантралююць паводзiны асуджаных, прымяняюць меры заахвочвання i спагнання, выдаюць дазволы на звальненне асуджаных з работы па ўласнаму жаданню ў перыяд адбывання пакарання i да т.п. Выкананне ўсiх гэтых функцый крымiнальна-выканаўчымi iнспекцыямi Рэспублiкi Беларусь немагчыма, калi асуджаны знаходзiцца за межамi краiны.

Як устаноўлена Крымiнальна-выканаўчым кодэксам, пакаранне ў выглядзе папраўчых работ адбываецца па месцы працы асуджаных. Калi асуджаны на момант уступлення прыгавору ў законную сiлу не працуе, яму прапаноўваюць уладкавацца на работу на працягу 15 дзён па ўласнаму жаданню. Калi асуджаны не ўладкаваўся на работу на працягу гэтага тэрмiну, ён накiроўваецца ў дзяржаўную службу занятасцi i працаўладкоўваецца ёю ў прыярытэтным парадку. У гэтым выпадку асуджаны не мае права адмовiцца ад прапанаванай яму работы па месцы жыхарства або ад павышэння квалiфiкацыi, перападрыхтоўкi.

У перыяд адбывання пакарання ў выглядзе папраўчых работ асуджанаму забараняецца спыняць працоўны дагавор па ўзгадненню бакоў або па ўласнаму жаданню без пiсьмовага дазволу крымiнальна-выканаўчай iнспекцыi. Асуджаны абавязаны паведамляць у крымiнальна-выканаўчую iнспекцыю аб змене месца працы i месца жыхарства, выконваць iншыя абавязкi, даведзеныя да яго гэтай iнспекцыяй.

Згодна з артыкулам 416 Крымiнальнага кодэкса РБ, злоснае ўхiленне асуджанага ад адбывання пакарання ў выглядзе папраўчых работ караецца арыштам на тэрмiн ад трох да шасцi месяцаў або абмежаваннем свабоды на тэрмiн да двух гадоў. Пры гэтым пад злосным ухiленнем прызнаецца парушэнне асуджаным парадку i ўмоў адбывання пакарання пасля аб’яўлення яму афiцыйнага папярэджання, а таксама знiкненне асуджанага з месца жыхарства з мэтай ухiлення ад адбывання пакарання.

Такiм чынам, усе пытаннi аб месцы i парадку адбывання папраўчых работ вашаму сыну неабходна ўзгадняць з крымiнальна-выканаўчай iнспекцыяй па месцы свайго ўлiку i выконваць яе прадпiсаннi. Пасля канчатковага адбывання пакарання месца сваёй працы ён зможа вызначыць самастойна, без узгадненняў з якiмi-небудзь дзяржаўнымi органамi.