Назад — у родную сям’ю

Источник материала:

Ва ўсiх аддзелах адукацыi на Мiншчыне ствараюцца сектары па абароне дзяцiнства.

Як паведамiлi «Звяздзе» ва ўпраўленнi адукацыi Мiнскага аблвыканкама, апошнiм часам намецiлася пазiтыўная тэндэнцыя стрымлiвання росту сiроцтва. Гэта адбылося ў вынiку мэтанакiраванай работы органаў аховы дзяцiнства, прыняцця рашэнняў аб стварэннi ў рэгiёнах сеткi сацыяльна-педагагiчных устаноў. Па стану на пачатак гэтага года ў банку даных на Мiншчыне налiчвалася 5456 дзяцей-сiрот i дзяцей, якiя засталiся без папячыцельства бацькоў. Летась iх было выяўлена 785.

Паводле iнфармацыi ўпраўлення адукацыi Мiнскага аблвыканкама, у мiнулым годзе 626 бацькоў былi пазбаўлены сваiх правоў. Зараз на сямейных формах выхавання знаходзiцца больш чым 3 тысячы дзяцей, а ў апякунскiх сем’ях — 1,7 тыс. У двух SОS-дзiцячых вёсках (яны створаны ў Мар’iнай Горцы i Бараўлянах) выхоўваецца 151 дзiця.

Апошнiм часам атрымалi шырокае распаўсюджванне такiя альтэрнатыўныя формы ўладкавання, як прыёмная сям’я i дзiцячыя дамы сямейнага тыпу. Летась былi створаны 3 дзiцячыя дамы сямейнага тыпу. Усяго на Мiншчыне зараз iх 25, дзе выхоўваецца больш як 150 дзяцей, а ў прыёмных сем’ях — 735.

Як заўважылi ў Мiнскiм аблвыканкаме, адзначаецца i станоўчая дынамiка па ўсынаўленню сiрот. У мiнулым годзе 59 дзяцей набылi новую сям’ю, з iх 8 — за мяжой. У мэтах прафiлактыкi сацыяльнага сiроцтва на Мiншчыне дзейнiчаюць 13 дзiцячых сацыяльных прытулкаў i 12 сацыяльна-педагагiчных цэнтраў.

Як паведамiлi ва ўпраўленнi адукацыi Мiнскага аблвыканкама, летась шматпрофiльную рэабiлiтацыю ў прытулках прайшло больш за тысячу дзяцей. Больш за палову з iх (597 дзяцей) вярнуліся да сваiх бацькоў.