Вылiк па кошту зямельнага ўчастка не прадугледжаны

Источник материала:

Школа падаткаплацельшчыка

— Маю дваiх непаўналетнiх дзетак. Разведзеная. Былы муж пазбаўлены бацькоўскiх правоў, таму алiментаў не плацiць. Цi магу я атрымлiваць у бухгалтэрыi сваёй арганiзацыi стандартны па- датковы вылiк у двайным памеры пры вылiчэннi падаходнага падатку як адзiнокая мацi, якой па сутнасцi з’яўляюся?

Антанiна Зельва, г. Мiнск.

У адпаведнасцi з Законам Рэспублiкi Беларусь «Аб падаходным падатку з фiзiчных асобаў», фiзiчныя асобы, на ўтрыманнi якiх ёсць дзецi да 18 гадоў цi дзецi-ўтрыманцы, маюць права на вылiк з атрыманых даходаў пры вылiчэннi падаходнага падатку ў памеры 2 базавых велiчынь на кожнае дзiця за кожны месяц падатковага перыяду. Пры гэтым удовам (удаўцам), адзiнокiм бацькам, апекунам цi папячыцелям гэты падатковы вылiк даецца ў двайным памеры.

Згодна з адпаведнымi iнструкцыямi Мiнiстэрства па падатках i зборах РБ, дакументам, якi пацвярджае права на атрыманне стандартнага падатковага вылiку ў двайным памеры для адзiнокiх бацькоў, з’яўляецца даведка, якая выдаецца аддзелам ЗАГСа, дзе ёсць звесткi з кнiгi запiсаў аб нараджэннi аб тым, што звесткi аб бацьку (мацi) запiсаны па ўказанню мацi (бацькi). У выпадку адсутнасцi гэтага дакумента падатковыя агенты (у вашым выпадку бухгалтэрыя прадпрыемства) пры вылiчэннi падаходнага падатку не маюць права на прадастаўленне стандартнага падатковага вылiку ў двайным памеры.

З улiкам таго, што ў разглядаемай сiтуацыi такая даведка спадарынi Антанiне выдадзена не будзе (бацька дзяцей вядомы), стандартны падатковы вылiк прадастаўляецца ёй у памеры 2 базавых велiчынь на кожнае дзiця.

— Стаю ў чарзе як маючы патрэбу ў паляпшэннi жыллёвых умоў. Набыў прыватны дом. У дагаворы куплi-продажы кошт набытай маёмасцi быў падзелены на дзве часткi: кошт жылога дома i цана зямельнага ўчастка, якi быў прадастаўлены для абслугоўвання жылога дома. Па вынiках года падаў дэкларацыю ў падатковы орган, каб атрымаць падатковы вылiк. Аднак падатковы вылiк далi толькi на кошт жылога дома. Цi з’яўляюцца дзеяннi падатковых iнспектараў справядлiвымi?

Аляксей К., Магiлёўская вобласць.

— Згодна з законам, фiзiчныя асобы, якiя маюць патрэбу ў паляпшэннi жыллёвых умоў i якiя накiроўвалi на працягу года грашовыя сродкi на будаўнiцтва цi набыццё жылля (пагашэнне крэдытаў на гэтыя мэты), маюць права на вылiк гэтых сум з даходаў пры вылiчэннi падаходнага падатку.

Што датычыцца сум, якiя былi накiраваны фiзiчнымi асобамi на набыццё зямельных участкаў, то ў адносiнах да такiх расходаў не працуе нi адна з iльгот, прадугледжаных законам. Дзеяннi ў гэтым накiрунку падатковых iнспектараў з’яўляюцца правiльнымi.

З гэтага тыдня ўсе складаныя i актуальныя пытаннi, звязаныя з падаткаабкладаннем, чытачы «Звязды» могуць задаць штодзень з 10.00 да 12.00 гадзiн па тэлефоне рэдакцыi (017) 287-17-51 або даслаць на адрас газеты лiстом.